У сувязі з распаўсюджваннем рэсператорных інфекцый спыніла наведванні аддзяленне дзённага знаходжання для пажылых людзей, якое функцыянуе на базе Цэнтра сацыяльнага абслугоўвання насельніцтва Дзятлаўскага раёна.
Пакуль што пенсіянераў просяць пабыць дома і абмежаваць свае кантакты.
Аднак, як падкрэслівае загадчыца аддзялення Галіна Касцюк, гэта зусім не значыць, што яе падапечныя застаюцца сам-насам з праблемамі і сумнымі думкамі. Па-першае, усе яны могуць разлічваць на дапамогу ў дастаўцы прадуктаў і лекаў, што арганізавана работнікамі Цэнтра, па-другое, падтрымліваць стасункі можна і дыстанцыйна, напрыклад, па тэлефоне. Сама Галіна Эдвардаўна і спецыяліст па сацыяльнай рабоце Алена Якаўчык часта набіраюць нумары падапечных, каб пацікавіцца іх здароўем і настроем. А нядаўна заклікалі сваіх майстрых-рукадзельніц уключыцца ў дабрачынную акцыю па пашыве медыцынскіх масак дома “Вам на здароўе!”.
– На прапанову адгукнуліся адразу некалькі нашых жанчын, – расказвае Галіна Эдвардаўна, – мы распрацавалі зручны алгарытм узаемадзеяння. Набываем тканіну. Для некаторых майстрых мы разам з Аленай Якаўчык кроім яе, іншыя робяць гэта самі. Затым дастаўляем матэрыялы падапечным, а напрыканцы забіраем у іх гатовыя маскі. Сустракаемся на адкрытым паветры, каб знізіць рызыку захворвання. Аб усіх акалічнасцях дамаўляемся па тэлефоне.
Забраць чарговыя партыі гатовых масак у дзвюх наведвальніц аддзялення мы накіраваліся разам з Галінай Касцюк.
Ядзвіга Гушча, жыхарка горада Дзятлава:
– Больш за 50 гадоў як аматар займаюся шыццём для сябе і блізкіх. У аддзяленні дапамагала рыхтаваць выставу “Джынсавая фантазія” і шыць калекцыю моднага адзення з джынсу, якую мы прадстаўлялі на гарадскіх святах. Цяпер карысныя ўменні зноў прыйшліся дарэчы: я пашыла ўжо некалькі дзясяткаў ахоўных масак. Пры неабходнасці буду шыць і больш. Такую работу звычайна выконваю за некалькі гадзін.
Сябрам па аддзяленні, ды і ўсім дзятлаўчанам увогуле, жадаю аптымізму, веры ў тое, што разам мы справімся з праблемай і будзем здаровыя. Да велікодных і майскіх святаў жадаю шчасця ў сем’ях, радасці і каб бяда нас мінула.
Ганна Жадзейка, жыхарка горада Дзятлава:
– Я адпрацавала ў атэлье больш за дваццаць гадоў. У дзевяностыя давялося звольніцца і ўжо да пенсіі працаваць на Дзятлаўскім сыраробным заводзе. Але швейнае майстэрства ў жыцці заўсёды было дарэчы. Вось і цяпер далучылася да дабрачыннай акцыі “Вам на здароўе”, каб сваімі ўменнямі аберагаць землякоў ад хваробы. Пашыла некалькі дзясяткаў двухслаёвых ахоўных масак з тэкстылю. Яны шчыльныя, таму аберагаюць лепш. Насіць такую маску можна дзве-тры гадзіны, затым яе трэба замяніць на новую або памыць. Пасля мыцця і прасавання яна зноў стане прыдатнай.
На жаль, спыненне захворвання – гэта не хуткі працэс. Нам, пажылым людзям, даводзіцца сядзець дома, але і мы, як бачыце, можам дапамагаць іншым. Жадаю ўсім землякам, каб хвароба іх не закранула.
Маскі, якія пашыюць гэтыя наведвальніцы аддзялення, а яшчэ Анастасія Капцеўская і Леакадзія Жук будуць перададзены медыкам Дзятлаўшчыны, а таксама размеркаваны паміж пажылымі людзьмі нашага раёна.
Ірына СТЫРНІК
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
