Кожны чалавек павінен ведаць родную мову, любіць родныя мясціны, сваю Радзіму.
Таму вельмі важна з ранняга ўзросту далучаць дзяцей да роднай мовы, з павагай ставіцца да яе, не саромецца на ёй размаўляць. Менавіта дашкольны ўзрост з’яўляецца найбольш спрыяльным перыядам для авалодання дзецьмі мовамі, у гэты час фарміруецца цікавасць і патрэба ў ведах.
Трэба адзначыць, што беларуская мова гучыць у дашкольным цэнтры развіцця дзіцяці № 2 горада Дзятлава кожную пятніцу. У першай малодшаяй групе дзеці таксама вучацца размаўляць па-беларуску: вітацца, дзякаваць, развітвацца, карыстацца словамі для выказвання сваіх жаданняў, просьбаў.
Да прыкладу, сёлета ў нашай дашкольнай установе праходзіў тыдзень беларускай мовы пад назвай “Ад прыказкі да казкі”. Ён быў прысвечаны літаратурным і фальклорным творам розных жанраў на роднай мове. Каб выклікаць цікавасць да беларускай мовы, літаратуры і мастацтва, мы кожны дзень слухалі забаўлянкі, пацешкі, беларускія народныя песенькі, невялікія вершы; стараліся выкарыстоўваць у стасунках як мага больш беларускіх словаў. Дзеці ўдзельнічалі ў разважанні-дыялогу «Што за казка?», пабывалі ў гасцях у казкі «Тры мядзведзі», расказвалі казку «Казляняткі і воўк», а затым прымалі ўдзел у пастаноўцы, гулялі ў рухомыя гульні, слухалі калыханкі з лялькай Арынай.
Нам, педагогам, было прыемна, калі раніцай прыходзілі бацькі і размаўлялі па-беларуску, прасілі дапамогі ў пошуку твораў на беларускай мове для чытання дзецям дома.
Мы ўпэўнены, што калі бацькі будуць размаўляць з дзецьмі на роднай мове як мага больш, чытаць ім мастацкія творы на беларускай мове, то нашы дзеці вырастуць сапраўднымі знаўцамі роднай, матулінай мовы.
Алена КАПКОВІЧ,
выхавальніца дашкольнага цэнтра развіцця дзіцяці № 2 г. Дзятлава
Подписывайтесь на телеграм-канал «Гродно Медиа Group» по короткой ссылке @GrodnoMediaGroup
