21 верасня на гарадскім стадыёне “Старт” ў горадзе Лідзе прайшлі першыя два туры спаборніцтваў першынства Рэспублікі Беларусь па футболе сярод дзяўчат у рамках рэспубліканскага праекта “Футбольная ліга дзяўчат ва ўзроставай катэгорыі да 13 гадоў”.
Упершыню на тэрыторыі Беларусі дзявочая футбольная прэм’ер-ліга U-13 стартавала на пачатку красавіка бягучага года. Праект рэалізуецца пад эгідай Асацыяцыі “Беларуская федэрацыя футбола” пры тэхнічнай і фінансавай падтрымцы міжнароднай федэрацыі футбола FІFА.
У ходзе спаборніцтваў арганізатары прапануюць дзявочым камандам праверыць свае магчымасці ў афіцыйных міжрэгіянальных матчах са сваімі аднагодкамі.
Каманды-ўдзельніцы падзелены на зоны па тэрытарыяльным прынцыпе: у кожнай групе задзейнічана аднолькавая колькасць футбольных каманд, і ўсе яны знаходзяцца на зручнай адлегласці адзін ад аднаго. Сістэма правядзення гульняў паміж камандамі ажыццяўляецца па двухкругавой сістэме.
Футбольныя сустрэчы восеньскага сезона пройдуць з верасня па лістапад. Каманды-ўдзельніцы прымуць удзел у 14 турах футбольнай прэм’ер-лігі. Чатыры з іх пройдуць на тэрыторыі Дзятлаўскага раёна.
Усяго ў восеньскім сезоне першынства па футболе сярод дзяўчат прымаюць удзел восем зборных каманд з розных рэгіёнаў Гродзеншчыны.
На тэрыторыі Лідскага раёна зборная каманда дзятлаўчанак сыграла два матчы. Першай прайшла гульня з камандай футбалістак з Бярозаўкі. Лік 2 : 2 стаў выніковым. З гродзенскай камандай “Неман” нашы дзяўчаты таксама згулялі ўнічыю. Фінал гульні вырашыўся лікам 1 : 1.
Па правілах спаборніцтваў каманды-пераможцы рэгіянальных зон чарговы раз выйдуць на рэспубліканскі этап, дзе ў сыграных па алімпійскай сістэме матчах вызначыцца лепшая каманда краіны.
Правядзенне фінальнага этапу спаборніцтваў чакаецца ў лістападзе, у Мінску.
Аксана АНДАЛЮКЕВІЧ
Фота Уладзіміра ГАНЧАРА