20 красавіка ў дзень рэспубліканскага суботніка каля абеліска Славы ў Дзятлаве была высаджана рабінавая алея да 75-годдзя вызвалення Беларусі ад нямецка-фашысцкіх захопнікаў.
На гэтым аб’екце добраўпарадкавання працавала кіраўніцтва Дзятлаўскага раённага выканаўчага камітэта, раённага Савета дэпутатаў, ваеннага камісарыята Дзятлаўскага раёна, раённага аддзела па надзвычайных сітуацыях, Дзятлаўскага РУП ЖКГ.
– Пасадзіць маладыя дрэўцы каля помніка да юбілейнай даты, адметнай для ўсёй нашай краіны, – добрая справа, – зазначыў старшыня Дзятлаўскага раённага выканаўчага камітэта Аляксандр Дубовік. – Маладыя рабінкі хутка пойдуць у рост, кожную весну будуць радаваць дзятлаўчан і гасцей горада белай квеценню, а восенню – палымяна-чырвонымі гронкамі ягад. Папрацаваўшы тут некалькі гадзін, мы пакінем людзям добрую памяць на доўгія гады.
Сёння да нас далучыцца і пасадзіць імянное дрэўца на алеі памяці старшыня Іўеўскага райвыканкама Аляксандр Іванавіч Булак. Яго дзед быў камандзірам партызанскай брыгады, якая дыслацыравалася на Дзятлаўшчыне. Сімвалічна, што нашчадак партызана зможа паўдзельнічаць у пасадцы алеі.
І вось ужо застукалі аб грунт рыдлёўкі, зазвінелі вёдры, работа закіпела. На некалькі хвілін яе перарваў візіт Аляксандра Булака, які прыехаў з сынамі. Хутка і госці далучыліся да працы.
– У час Вялікай Айчыннай вайны на Дзятлаўшчыне, у раёне Руды Яварскай, у партызанскай брыгадзе “Перамога” ваяваў наш дзед, Павел Іванавіч Булак, – расказаў Аляксандр Іванавіч, – Мы якраз едзем на малую радзіму наводзіць парадак. Пахаваны наш продак-партызан у Дзярэчыне. Памятаем, любім, шануем. Па дарозе плануем заехаць у Малую Волю. Якраз у тым накірунку мясціны, дзе ваявала брыгада дзеда.
Аляксандр Булак, яго сыны Аляксандр і Іван пасадзілі дрэўца і сфатаграфаваліся каля яго на памяць.
Праз некаторы час работы каля абеліска Славы былі скончаны Каля маладых рабінак умацавалі шыльду “Алея закладзена ў гонар 75-годдзя вызвалення Рэспублікі Беларусь ад нямецка-фашысцкіх захопнікаў. Красавік 2019”
Ірына СТЫРНІК