Валейбол у нашай школе – адзін з любімых відаў спорту. Ім з задавальненнем займаюцца вучні, настаўнікі і мясцовыя жыхары. Спаборніцтвы па валейболе заўсёды збіраюць не толькі шмат удзельнікаў, але і гледачоў.
У спартыўнай зале Хвінявіцкага дзіцячага сада-сярэдняй школы прайшоў юбілейны дваццаты калядны турнір. На ўрачыстым адкрыцці з прывітальным словам да аматараў гульні выступіла Русін А.А., намеснік дырэктара па вучэбнай рабоце, якая павіншавала ўсіх прысутных з надыходзячым Новым годам і Калядамі, пажадала ўдзельнікам поспеху і толькі перамог. Алена Аляксееўна адзначыла, што падобнага роду спаборніцтвы – гэта не толькі спартыўная барацьба, але і нагода сустрэцца ўсім разам, добрая магчымасць з карысцю правесці свой вольны час. Валейбол – камандны від спорту, і вынік удзелу ў спаборніцтвах залежыць ад сумесных намаганняў усіх членаў каманды без выключэння.
Бурная размінка паказала сапернікам, што ўсе настроены на перамогу і гатовы змагацца за кожны мяч. На гэты раз гульня сабрала аж 6 каманд: 2 зборныя каманды моладзі, каманда вучняў, настаўнікаў, КСУП “Хвінявічы” і чацвёрты год запар у нашым турніры прымаюць удзел рабяты з вёскі Руда Яварская. Вось праведзена жараб’ёўка, складзены графік гульняў. Суддзя спаборніцтваў даў свісток. Далей пачалося самае галоўнае і цікавае. Сур’ёзны падыход быў бачны ўжо ў першай гульні, кожны рознымі спосабамі не даваў упасці мячу на сваёй пляцоўцы. Галоўная задача для ўдзельнікаў – не памыліцца пры прыёме. Валейбалісты настроены на перамогу. Варта адзначыць, што спартыўная барацьба паміж камандамі набыла бескампрамісны характар з першых хвілін матчу.
Апошняя гульня была самая хвалюючая. Удзельнікі стараліся быць спакойнымі, не спяшацца і не дапускаць памылак. Моцныя, дакладныя падачы і стрыманыя мяккія падманныя хады – вось чым была напоўнена гульня за прызавое месца. Але, як бы абедзве каманды не стараліся, першае месца толькі адно. І ў гэтым годзе пераможцай спаборніцтваў стала каманда моладзі.
Шмат эмоцый, выдатны настрой і спартыўны адпачынак – вось чым узнагародзіла школа ўсіх удзельнікаў спаборніцтваў.
Рагойжа Н.А., настаўнік рускай мовы і літаратуры Хвінявіцкага д/с-СШ