Зіма, асабліва напярэдадні навагодніх і калядных святаў, – час цудаў і падарункаў. І кожнае дзіця марыць, каб у госці завітала добрая казка. Ажыццявіць дзіцячыя мары могуць дарослыя.
З гэтай мэтай 18 снежня ў прытулак сацыяльна-педагагічнага цэнтра горада Дзятлава наведаліся старшыня Гродзенскай абласной арганізацыі Беларускага прафсаюза работнікаў дзяржаўных і іншых установаў Алена Бераснева і старшыня Дзятлаўскай раённай арганізацыі прафсаюза работнікаў дзяржустановаў Ірына Жэгала. Справа ў тым, што ў рамках дабрачыннай акцыі “Прафсаюзы – дзецям” у пераднавагоднія дні актывісты прафсаюзнага руху нашай краіны наведваюць падшэфныя сацыяльна-педагагічныя цэнтры, школы-інтэрнаты, дзіцячыя дамы сямейнага тыпу. Мэта перадсвяточнай акцыі простая і зразумелая – не пакінуць без увагі ні адно дзіця, асаблівую ўвагу прафсаюзныя лідары скіроўваюць на дзяцей, якія засталіся без апекі бацькоў, інвалідаў, дзетак з малазабяспечаных і шматдзетных сем’яў.
У сацыяльным прытулку аб’ектам увагі гасцей стаў дзевяцігадовы Дзяніс. Так склалася, што ён і пяцігадовы Максім (цяпер знаходзіцца ў бальніцы) сустрэнуць святы не дома, а ў дзяржаўнай установе. Тым не менш, хлопчыкі не застануцца без падарункаў, цукерак і навагодняга ранішніка. Першыя навагоднія падарункі Дзяніс прымаў ад прафсаюзных лідараў.
Алена Бераснева прывезла ў прытулак дзіцячую літаратуру, нездарма ж кажуць, што кніга – лепшы сябар і лепшы падарунак.
– Скажы, Дзяніс, ці любіш ты чытаць кнігі? – пацікавілася Алена Пятроўна, а даведаўшыся, што Дзяніс любіць вучыцца, з радасцю прадоўжыла знаёміць яго з навінкамі, якія трапяць на кніжную паліцу прытулка. – Тут “Чароўныя казкі”, “Казачныя гісторыі”, а вось – “Энцыклапедыя насякомых”, кніга пра жывую прыроду, а гэта класіка – “Пан Тадэвуш” Міцкевіча. Глянь, гэта кніга пра дыназаўраў. Яна павінна абавязкова табе спадабацца. Дамовімся, што, калі мы прыедзем у наступны раз, ты раскажаш, аб чым прачытаў. Тут шмат цікавых гісторый і кнігі для развіцця, будзеш іх чытаць і дзяліцца новымі ведамі з сябрамі.
Дзяніс падзякаваў за падарункі і прызнаўся, што найбольш яго зацікавіла “Энцыклапедыя насякомых”, хутчэй за ўсё яна будзе прачытана першай.
Са словамі падзякі да гасцей звярнулася дырэктар сацыяльна-педагагічнага цэнтра горада Дзятлава Ала Жэгалік.
– Алена Пятроўна, Ірына Дзмітрыеўна, дзякуй, што вы нас не забываеце і аказваеце падтрымку. Дзякуй, што прыехалі і павіншавалі нас да Дня абароны дзяцей, а цяпер і да навагодніх святаў.
У сваю чаргу Алена Бераснева паабяцала, што гэта не апошні візіт на Дзятлаўшчыну, будуць і новыя сустрэчы, падарункі. На памяць для сацыяльнага прытулка Алена Бераснева і Ірына Жэгала пакінулі прысвячэнне і свае аўтографы на адной з падораных кніг. Дзяніс расказаў гасцям аб сваім захапленні – майстраваць прыгожыя рэчы з паперы і дапаможных матэрыялаў, паказаў ёлачку, якую зрабіў сам, і навагоднія ўпрыгажэнні. Развітваліся з гасцямі цёпла, з пажаданнем: “Да новых сустрэч”.
Ірына КАЎКЕЛЬ
