Асобныя катэгорыі сем’яў, дзе гадуюцца дзеці-інваліды, па-першае, маюць права на дапамогу на дзяцей старэйшых за 3 гады.
Такое права маюць маці (мачаха) або бацька (айчым) у поўнай сям’і, адзін з бацькоў у няпоўнай сям’і, усынавіцель (удачарыцель), апякун (папячыцель) пры выхаванні імі дзіцяці (дзяцей) старэйшых за 3 гады, калі ў сям’і:
гадуецца дзіця-інвалід ва ўзросце да 18 гадоў;
гадуецца дзіця ва ўзросце да 18 гадоў, інфіцыраванае вірусам імунадэфіцыту чалавека;
бацька (айчым) або ўсынавіцель (удачарыцель) праходзіць тэрміновую ваенную службу, альтэрнатыўную службу;
абодва бацьки (маці (мачаха), бацька (айчым)) у поўнай сям’і ці адзін з бацькоў у няпоўнай сям’і, усынавіцель (удачарыцель) з’яўляюцца інвалідамі першай ці другой групы, а таксама калi адзiн з бацькоў (маці (мачаха) або бацька (айчым)) у поўнай сям’і з’яўляецца інвалідам першай групы, а другі ажыццяўляе догляд за ім і атрымлівае дапамогу, прадугледжаную заканадаўствам.
Абавязковая ўмова – каб працаздольны бацька ў поўнай сям’і або адзін з бацькоў у няпоўнай сям’і працавалі ў Рэспубліцы Беларусь ці былі занятыя ў папярэднім годзе не менш за 6 месяцаў, а таксама працавалі (былі занятыя) на момант звароту па дапамогу.
Тэрмін падачы заявы для назначэнні дапамогі: дапамога назначаецца з дня ўзнікнення права пры звароце да заканчэння 6 месяцаў з дня яго ўзнікнення. У выпадку пропуску шасцімесячнага тэрміну дапамога назначаецца з даты падачы заявы.
Па-другое, на дапамогу па доглядзе дзіцяці-інваліда.
Права на дапамогу па доглядзе дзіцяці-інваліда ва ўзросце да 18 гадоў маюць маці (мачаха) або бацька (айчым) у поўнай сям’і, адзін з бацькоў у няпоўнай сям’і, усынавіцель (удачарыцель), апякун (папячыцель) дзіцяці-інваліда, якія фактычна даглядаюць такое дзіця, калі яны:
не працуюць ці працуюць на ўмовах няпоўнага працоўнага часу;
атрымліваюць пенсію ці штомесячную страхавую выплату ад Белдзяржстраха;
з’яўляюцца індывідуальнымі прадпрымальнікамі, натарыусамі, адвакатамі, асобамі, якія ажыццяўляюць рамесную дзейнасць, дзейнасць у сферы аграэкатурызму і адпаведную дзейнасць, прыпыненую ў парадку, устаноўленым заканадаўствам;
знаходзяцца ў водпуску па доглядзе дзіцяці-інваліда ці іншых дзяцей да трох гадоў або ў акадэмічным водпуску.
Па-трэцяе, на аказанне малазабяспечаным грамадзянам дзяржаўнай адраснай сацыяльнай дапамогі ў выглядзе штомесячнай або аднаразовай сацыяльнай дапамогі.
Штомесячная сацыяльная дапамога прадастаўляецца сем’ям (грамадзянам) пры ўмове, што іх сярэднедушавы даход, які вызначаецца ў парадку, устаноўленым Саветам Мiнiстраў Рэспублiкi Беларусь, па аб’ектыўных прычынах ніжэйшы за найбольшую велічыню бюджэту пражытачнага мінімуму ў сярэднім на душу насельніцтва, зацверджанага Міністэрствам працы і сацыяльнай абароны, за два апошнія кварталы (далей – крытэрый патрэбнасці).
Аднаразовая сацыяльная дапамога прадастаўляецца сем’ям (грамадзянам), якія па аб’ектыўных прычынах апынуліся ў складанай жыццёвай сітуацыі, якая парушае нармальную жыццядзейнасць, пры ўмове, што іх сярэднедушавы даход складае не больш за 1,5 велічыні крытэрыя патрэбнасці.
Па-чацвёртае, на аказанне матэрыяльнай дапамогі са сродкаў Фонду сацыяльнай абароны насельніцтва і магчымую гуманітарную, псіхалагічную, юрыдычную дапамогу, паслугі няні.
Па-пятае, на датэрміновую пенсію бацькам дзяцей-інвалідаў у адпаведнасці з артыкулам 20 Закона Рэспублікі Беларусь “Аб пенсійным забеспячэнні”.
Маці, якія гадуюць дзяцей-інвалідаў (інвалідаў з дзяцінства) не менш за 8 гадоў у перыяд да іх паўналецця, маюць права на пенсію па ўзросце са зніжэннем агульнаўстаноўленага пенсійнага ўзросту на 5 гадоў пры стажы работы не менш за 20 гадоў, з якіх не менш за 5 гадоў – страхавога стажу.
Бацькі (отцы), якія гадуюць дзяцей-інвалідаў (інвалідаў з дзяцінства) не менш за 8 гадоў у перыяд да іх паўналецця, маюць права на пенсію па ўзросце са зніжэннем агульнаўстаноўленага пенсійнага ўзросту на 5 гадоў пры стажы работы не менш за 25 гадоў, з якіх не менш за 5 гадоў – страхавога стажу, калі маці дзіцяці-інваліда (інваліда з дзяцінства) не выкарыстала набытага ёю права на пенсію па ўзросце і адмовілася ад гэтага права на карысць бацькі ці не выкарыстала права на пенсію па ўзросце ў сувязі са смерцю.
Па-шостае, на дадатковы свабодны ад работы дзень у месяц. Аднаму з бацькоў, у сям’і якога гадуецца дзіця-інвалід, прадастаўляецца па яго жаданні дадатковы свабодны ад работы дзень у месяц з аплатай у памеры сярэдняга дзённага заробку за кошт сродкаў дзяржаўнага сацыяльнага страхавання.
Прыём неабходных дакументаў ажыццяўляецца па заяўным прынцыпе.
Алена НАВІЧЭНКАВА,
намеснік начальніка ўпраўлення па працы, занятасці і сацыяльнай абароне Дзятлаўскага райвыканкама
