У Дзень Перамогі, 9 мая, у Дзятлаве пройдзе марш памяці, прымеркаваны да вызвалення нашай краіны ад нямецка-фашысцкіх захопнікаў.
Вялікая Айчынная вайна закранула практычна кожную савецкую сям’ю. Памяць пакаленняў і сёння свята захоўвае імёны франтавікоў і працаўнікоў тылу, якія адстаялі ў ліхія ваенныя гады мір, свабоду і незалежнасць Радзімы.
Ужо трэці год запар у Дзятлаве ў Дзень Перамогі раённы камітэт грамадскага аб’яднання “БРСМ” арганізоўвае шэсце “Бессмяротны полк” у рамках моладзевай акцыі “І ў памяці навекі імёны”. Удзельнікі яе ў святочнай калоне пранясуць ад Цэнтра культуры і народнай творчасці па вуліцы Міцкевіча да плошчы 17 Верасня фотапартрэты сваякоў-ветэранаў Вялікай Айчыннай вайны, якія загінулі на палях бітваў або памерлі ў пасляваенны час.
Саюз моладзі запрашае ўсіх жадаючых прыняць удзел у шэсці.
Хочацца адзначыць, што фотапартрэты ветэранаў могуць быць любога памеру, з асновай на стойцы або без яе – гэта не прынцыпова. Галоўнае – памяць пра нашых дзядоў і прадзедаў, якія ахвяравалі свае жыцці для вызвалення Радзімы ад нямецка-фашысцкіх захопнікаў.
Фарміраванне калоны адбудзецца 9 мая ў 10 гадзін раніцы каля Цэнтра культуры і народнай творчасці.
Ірына КАМАРОВА
Стоит почитать:
Дзятлаўчане сустрэлі свята Вялікадня. Ранішняе шэсце вакол касцёла (фота+відэа)
