Працягваем сачыць за перамяшчэннем футбольнага праекта. На гэты раз юнакі спартыўнай дзіцяча-юнацкай школы завіталі ў Круцілавіцкую сярэднюю школу, ім перадалі эстафету маленькія футбалісты з Таркачоў. Актавая зала змясціла ўсіх жадаючых даведацца пра гісторыю развіцця сусветнага і беларускага футбола.
Прыхільнікаў гульні пазнаёміў з цікавымі звесткамі пра футбол ідэйны стваральнік і арганізатар праекта Уладзімір Ганчар. Дзеці ад цікавасці нявольна набліжаліся ўсё бліжэй да экрана – настолькі захапіла школьнікаў змястоўная інфармацыя ўжо знаёмай нам мультымедыйнай презентацыі. Азартная эстафета-размінка нікога не пакінула раўнадушным. Тут знайшлі сябе і заўзятыя прыхільнікі спаборніцтваў, і простыя гледачы: першыя сталі ўдзельнікамі, другія – балельшчыкамі. Футбольны матч згулялі хлопчыкі і дзяўчынкі: 1:0 на карысць хлопчыкаў. Па выніках гульні, як павялося, вызначаны лепшыя ігракі. Менавіта яны складуць камандны састаў і пазмагаюцца за першае месца ў фінальнай гульні 18 мая на стадыёне “Колас” у Дзятлаве. Уладзімір Ганчар павіншаваў пераможцаў, уручыў падарункі ад Беларускай федэрацыі футбола і пажадаў поспехаў у фінальнай гульні.
Аксана АНДАЛЮКЕВІЧ
Стоит почитать: