У аграгарадку Дварэц адбыўся чарговы сельскі сход па пытаннях пажарнай бяспекі і захавання грамадскага правапарадку. У сустрэчы з вяскоўцамі ўзялі ўдзел старшыня Дзятлаўскага раённага Савета дэпутатаў Аляксандр Бараноўскі, начальнік Дзятлаўскага раённага аддзела па надзвычайных сітуацыях Уладзімір Нячаеў, начальнік аддзела ўнутраных спраў Дзятлаўскага райвыканкама Аляксандр Біль, старшыня Дварэцкага сельвыканкама Тамара Перапечына. На сходзе таксама прысутнічалі намеснік дырэктара Дзятлаўскага раёна газазабеспячэння Юрый Ганчар і начальнік раённай інспекцыі энерганагляду Вячаслаў Кець.
Да сельскага сходу ў Дварцы далучылася не толькі дарослае насельніцтва аграгарадка, але і дзеці. На сустрэчу са школьнікамі на пажарнай машыне прыбылі ратаўнікі пажарнай аварыйна-выратавальнай часці №14 гарпасёлка Наваельня. Яны расказалі дзецям аб прафесіі пажарнага, паказалі ў дзеянні ўвесь бараты арсенал, якім карыстаюцца ратаўнікі ў надзвычайных сітуацыях, прапанавалі прысутным адчуць сябе ратаўнікамі, апрануўшы пажарную амуніцыю. За правільныя адказы на пытанні па пажаранай бяспецы школьнікі атрымалі прызы – расфарбоўкі, памяткі і наклейкі са слушнымі парадамі.
Сам сельскі сход пачаўся з анкетавання, якое правялі юныя ратаўнікі-пажарныя, і прадоўжыўся праглядам дакументальнай стужкі “Цана імгнення”. Яе немагчыма глядзець без слёз. Рэчаіснасць шакіруе, аднак прысутныя ў зале могуць прыкласці ўсе намаганні, каб не дапусціць падобных здарэнняў у сваім жыцці, заўважыў інспектар Дзятлаўскага РАНС Аляксандр Беленка. Ён агучыў несуцяшальную статыстыку сёлетніх пажараў у раёне і гібелі людзей у іх.
Штораз на сельскіх сходах уздымаюцца аднатыпныя праблемы, якія не перастаюць быць актуальнымі. Па-ранейшаму сярод прычын пажараў у лідарах – неасцярожнае абыходжанне з агнём пры курэнні; галоўным фактарам учыненых крадзяжоў з’яўляецца неабачлівасць саміх пацярпелых, многія злачынствы на тэрыторыі раёна дапускаюцца з-за людской абыякавасці. Таму сельскія сходы па прафілактыцы і тлумачальнай рабоце маюць вялікае значэнне.
Завяршыўся сельскі сход у аграгарадку Дварэц на пазітыўнай ноце: з канцэртнай праграмай перад прысутнымі выступілі мясцовыя і дзятлаўскія работнікі культуры – Аляксандр і Людміла Баклушыны, Ганна Харлінская, Таццяна Дудкіна.
Н. АВЯРЧУК
Фота аўтара