4 мая ў гарадскім пасёлку Наваельня прайшоў мітынг памяці на месцы пахавання мірных жыхароў, расстраляных у гады Вялікай Айчыннай вайны.
Удзел у ім прынялі прадстаўнікі раённага і сельскага выканаўчых камітэтаў, пракуратуры, прафсаюзаў, грамадскіх аб’яднанняў, працоўных калектываў, педагогі і навучэнцы Новаяльнянскай сярэдняй школы.
Сабраліся на ўскраіне пасёлка, на месцы, дзе больш за 80 гадоў таму адбылася страшная трагедыя – масавае забойства мірнага насельніцтва, аб чым сёння нагадвае мемарыял.
– Мы ўшаноўваем памяць расстраляных нямецкімі карнікамі, астанкі якіх былі перапахаваны 8 снежня 2022 года, – звярнулася да ўдзельнікаў мерапрыемства старшыня Новаяльнянскага сельвыканкама Людміла Радзевіч. – У 1942-1943 гадах кар’ер Наваельня выкарыстоўваўся фашыстамі як месца знішчэння мірных людзей. Тут было расстраляна каля паўтысячы чалавек. Жахі Вялікай Айчыннай вайны сталі чорнай старонкай беларускай гісторыі. І сёння мы павінны паказаць сапраўднае аблічча нацызму і фашызму. Трэба, каб усе, асабліва моладзь, ведалі і памяталі, што гэта такое. Шлях ад міру да вайны вельмі кароткі. Варта разумець, што толькі ў мірны час падрастаючае пакаленне можа будаваць сваю будучыню і рэалізоўваць сябе. Мы павінны ўвекавечваць такія месцы памяці, каб людзі ведалі, куды можна прыйсці і аддаць даніну пашаны і павагі загінулым.
Тэму прадоўжыў пракурор Дзятлаўскага раёна Віталій Юрго:
– Сімвалічна, што мерапрыемства праводзіцца напярэдадні Дня Перамогі. Па даручэнні Прэзідэнта Рэспублікі Беларусь Аляксандра Лукашэнкі ў 2021 годзе Генеральным пракурорам Беларусі ўзбуджана крымінальная справа аб генацыдзе беларускага народа ў гады Вялікай Айчыннай вайны. У час яе расследавання ўстаноўлены новыя месцы зладзействаў. Галоўная мэта такой дзейнасці не толькі вызначыць імёны загінулых, але і ўстанавіць вінаватых. У 2021-2022 гадах у Наваельні на гэтым месцы праходзілі раскопкі, знойдзены астанкі, якія пацвердзілі факты расстрэлу. Гэта пахаванне вельмі сімвалічна не толькі для новаяльнянцаў, але і для жыхароў усёй Беларусі, бо тут мы разумеем, якія зладзействы ажыццяўляліся нямецка-фашысцкімі захопнікамі і іх памагатымі.
Вядучыя мерапрыемства Галіна Сушко і Наталля Нагорная нагадалі прысутным, што на Гродзеншчыне трэці год запар рэалізоўваецца шырокамаштабны патрыятычны праект “Памяць. Адзінства.
Перамога” па стварэнні музея візуальных формаў камунікацыі пад адкрытым небам, якія ўвекавечваюць памяць аб абаронцах Айчыны і ахвярах генацыду беларускага народа. Ужо ўстаноўлена больш за 200 інфармацыйных шыльдачак. Тут у 2022 годзе адкрыта 207-я форма візуальнай камунікацыі на месцы генацыду мірнага насельніцтва яўрэйскай нацыянальнасці на тэрыторыі Дзятлаўскага раёна, скарыстацца якой можна з дапамогай мабільнага тэлефона.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
