Трэці год запар у аграгарадку Бердаўка, што на Лідчыне, у сядзібе Дзембавецкіх ладзіцца вясенні шляхецкі баль, арганізатары якога запрашаюць усіх жадаючых акунуцца ў атмасферу ХІХ стагоддзя.
І няхай сядзіба даўно ператварылася ў мясцовы Дом культуры, яго работнікі Аляксандр і Інэса Парфенчыкавы беражліва захоўваюць звычаі продкаў, культывуюць сямейныя каштоўнасці і актыўна адраджаюць мясцовыя бальныя традыцыі.
Вось і на гэты раз Аляксандр Генадзьевіч і Інэса Георгіеўна выступілі ў ролі гасцінных гаспадароў сядзібы – графа і графіні Дзембавецкіх і запрасілі ў свой салон на вечар бальных танцаў і рамансаў больш за 25 пар, у ліку якіх была і моладзь.
Не пакінулі без увагі вясенні шляхецкі баль у Бердаўцы і наведвальнікі аб’яднання па інтарэсах “ЭлітДанс”, што функцыянуе пры Новаяльнянскім доме культуры, кіраўніком якога з’яўляецца Анатоль Кардаш.
Як расказаў Анатоль Аляксандравіч, з сабой на Лідчыну яны запрасілі музыкантаў Новаяльнянскай дзіцячай школы мастацтваў Юрыя і Наталлю Жданюк. На кларнэце і фартэпіяна сямейная пара сыграла дзве прыгожыя музычныя кампазіцыі “Маленькая кветачка” і “Вясновы сад”, а ўдзельнікі харэаграфічнага аб’яднання падрыхтавалі выступленне і майстар-клас па бальных танцах.
– На балі мы выступілі з нядаўна пастаўленым танцавальным нумарам з рамантычнай назвай “Вясенняя рапсодыя”, – расказаў Анатоль Кардаш. – Як ахарактарызавала пастаноўку мая былая настаўніца па харэаграфіі, чэмпіёнка Еўропы па танцах 80-х гадоў Надзея Бірун, – “танец цудоўны”. Думаю меркаванне Надзеі Віктараўны раздзялілі ўсе нашы гледачы. Яшчэ ў Бердаўку мы “прывезлі” майстар-клас па контардансе, польку-тройку, а таксама адметны і цікавы кацільён “Колеры”. Ён характэрны тым, што пары фарміруюцца за кошт каляровых стужак, якія наўгад выцягваюць і павязваюць сабе на рукі дамы і кавалеры. Супалі колеры – склалася танцавальная пара. Наогул, вясенні баль выклікаў самыя прыемныя і яркія ўражанні. У праграме былі выступленні ўзорнага ансамбля танца “Забавушка”, прысутных не пакінулі раўнадушнымі танцы-спектаклі ад лідскага рыцарскага клуба, у якіх змог паўдзельнічаць і я.
Напрыканцы лепшыя пары і калектывы былі адзначаны ўзнагародамі. Анатолю Кардашу па выніках агульнага галасавання прысвоена званне “Кавалер балю”, а аб’яднанне па інтарэсах “ЭлітДанс” Новаяльнянскага дома культуры вярнулася ў пасёлак з падзякай за сваё выступленне. Дарэчы, жыхары Дзятлаўшчыны, якім падабаецца танцавальная культура нашых продкаў, калі жадаюць і самі ўпэўнена адчуваць сябе на любым балі ці танцавальнай вечарыне, могуць далучацца да ўдзельнікаў аб’яднання “ЭлітДанс”. Заняткі праходзяць у Новаяльнянскім доме культуры па чацвяргах у 18 гадзін і нядзелях у 16 гадзін 30 хвілін. Паўгода практыкі – і вы таксама зможаце прыгожа танцаваць.
Ірына СТЫРНІК
Фотаздымкі прадастаўлены Анатолем КАРДАШОМ
