“Зялёная” памятная акцыя прайшла ў Дзятлаўскім філіяле “Гроднааблпаліва”.
Гэта была акцыя з эмоцыямі. Пасадку яблыняў і грушы ажыццяўлялі ў пазначаных калкамі месцах, адначасова гучна жартавалі і ўяўлялі, як маладыя саджанцы стануць зялёным аазісам і добра будзе пачаставацца іх смачнымі пладамі.
Сумесна закласці фруктовы сад у рамках рэспубліканскага суботніка і прымеркаваны да 525-годдзя горада Дзятлава дырэктар Дзятлаўскага філіяла “Гроднааблпаліва” Васілій Шпакоўскі запрасіў на сваё прадпрыемства гасцей: старшыню раённага выканаўчага камітэта Андрэя Садоўскага, яго намеснікаў Віталія Шулейку, Дзмітрыя Баравіка і калектыў Дзятлаўскага цэнтра банкаўскіх паслугаў “Белаграпрамбанк” на чале з дырэктарам Сяргеем Клімко.
– Спакон веку фруктовы сад – сімвал дабрабыту, багацця, дастатку, чаго шчыра жадаю ў юбілейны год нашаму гораду і яго жыхарам. Думаю, гэтыя дрэвы, высаджаныя ў гонар 525-годдзя Дзятлава, зробяць тэрыторыю прадпрыемства дагледжанай і прывабнай, будуць нагадваць калектыву і тым, хто прыняў удзел у сённяшняй пасадцы, зноў і зноў пра гісторыю нашага краю, дазволяць дакрануцца да яе і зразумець, што сучаснасць і будучыня залежаць толькі ад нас, – адзначыў Васілій Шпакоўскі.
Васілій Іванавіч прапанаваў сімвалічна першыя тры дрэўцы пасадзіць кіраўніку раёна, сябрам з Белаграпрамбанка і “старажылам” прадпрыемства: Галіне Губко, якая працуе ў Дзятлаўскім філіяле “Гроднааблпаліва” 35 гадоў, Наталлі Мазура – 30 гадоў, Валерыю Райдзюку – 10 гадоў.
– Пасадзіць дрэва – гэта выдатная магчымасць пакінуць свой след на зямлі. А калі ініцыятыва закласці сад выходзіць не з-пад адміністрацыйнага ціску, а ад кіраўніка прадпрыемства і яго калектыву, гэта падзея заслугоўвае павагі і падтрымкі – добры, высакародны пачын, адчуваецца рэальнае задавальненне ад удзелу ў яе рэалізацыі, – звярнуўся да ўсіх прысутных старшыня райвыканкама Андрэй Садоўскі.
Цікава, што яблыні для пасадкі, усяго 45 саджанцаў гатункаў “Вербнае”, “Чэмпіён, “Алеся”, закупілі гаспадары, а вось госці з Белаграпрамбанка прывезлі саджанец грушы.
– Мы хацелі не проста паўдзельнічаць у акцыі, але і прыўнесці, калі можна так сказаць, памятную “фішку” ад свайго калектыву – пасярэдзіне яблыневага саду будзе красавацца наша груша, а побач устанавілі сімвалічны камень з лагатыпам нашай установы, – падзяліўся ідэяй дырэктар Сяргей Клімко.
Дзятлаўчане любяць свой край і хочуць бачыць яго прыгожым і добраўпарадкаваным. Чарговы прыклад таму – яблыневы сад у Дзятлаўскім філіяле “Гроднааблпаліва”.
Ірына КАМАРОВА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
