Завяршыўся зімовы чэмпіянат ААТ “Граніт-Агра” па міні-футболе, які праходзіў у межах праекта “Круцілавічы – здаровы пасёлак”.
У ім прымалі ўдзел 6 каманд: “Граніт-Агра”, “ФК Круцілавічы”, “Наваельня”, “Зэльва”, “Альберцін” (г. Слонім), “Novo Stars” (г. Навагрудак).
У завяршальны гульнявы дзень адбыліся 4 матчы: “Альберцін” – “Наваельня” (3 : 2), “ФК Круцілавічы – Альберцін” (1 : 11), “Наваельня” – “Novo Stars” (5 : 3), “ФК Круцілавічы” – “Альберцін” (6 : 10).
Аматараў футбола павіншаваў з завяршэннем чэмпіянату дырэктар ААТ “Граніт-Агра” Станіслаў Мазур:
– Дзякуй за выдатны футбол, які вы паказвалі на працягу гэтых месяцаў. Гульня прыносіла задавальненне не толькі вам, але і нашым гледачам. Нягледзячы на тое, што надвор’е рабіла свае карэктывы, чэмпіянат прайшоў пры актыўным удзеле сапраўдных аматараў спорту. Дзякуй камандам з розных гарадоў, якія знайшлі час, матэрыяльныя рэсурсы і жаданне, каб сустрэцца ў футбольных баталіях. Заслужаныя ўзнагароды атрымаюць усе футбалісты.
Лепшым маладым гульцом турніру стаў Вадзім Сёмуха з “ФК Круцілавічы” (юнак вучыцца ў 9 класе Круцілавіцкай сярэдняй школы!), самым сумленным гульцом быў прызнаны Андрэй Філіповіч (“Зэльва”), лепшы абаронца – Аляксей Мінец (“Альберцін”), лепшы бамбардзір – Андрэй Жыдко (“Наваельня”): на яго рахунку 27 забітых галоў, лепшы варатар – Сяргей Варанюк (“ФК Круцілавічы”), лепшы гулец – Арцём Пісарук (“Novo Stars”).
Галоўны суддзя спаборніцтваў Дзяніс Трафімчык падзякаваў камандам за актыўны ўдзел, спартыўны дух і павагу да сапернікаў:
– Рады, што атрымалася арганізаваць такі сур’ёзны чэмпіянат пры ўдзеле аматараў футбола з Дзятлаўшчыны і раёнаў-суседзяў. На працягу трох месяцаў удзельнікі змагаліся за чэмпіёнства, да апошняга захоўвалася інтрыга, хто стане пераможцам.
Першае месца турніру заняла каманда “Наваельня”, віцэ-чэмпіёнамі сталі футбалісты “ФК Круцілавічы”, бронза – у слонімскага “Альберціна”.
Усе ўдзельнікі былі адзначаны граматамі і грашовымі прэміямі, атрымалі ў падарунак спартыўны інвентар, прызёры чэмпіянату ўзнагароджаны кубкамі і медалямі адпаведных ступеняў.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga