10 жніўня выязны прыём грамадзян у аграгарадку Войневічы правёў старшыня Дзятлаўскага раённага выканаўчага камітэта Андрэй Садоўскі.
Кіраўніку раёна паступіў тэлефонны зварот ад жыхаркі горада Мінска. Заяўніца расказала, што яе састарэлая матуля жыве ў вёсцы Малыя Шастакі. Нядаўна пенсіянерка сутыкнулася з праблемай: у яе нечакана скончылася “блакітнае паліва” ў газавым балоне. Згодна з графікам дастаўкі новых балонаў, да візіту работнікаў Дзятлаўскага раёна газазабеспячэння ў Малыя Шастакі заставалася яшчэ нямала дзён, а пажылой жанчыне неабходна было нейкім чынам гатаваць ежу. Каб паскорыць выкананне заяўкі, дачка пенсіянеркі патэлефанавала дыспетчару вытворчага ўпраўлення “Слонімгаз”, дзе і фарміруюцца такія запыты. Пасля агучвання сваёй просьбы на другім канцы провада яна пачула: “Тэлефануйце ў Дзятлаўскі раён газазабеспячэння”. Каму канкрэтна, па якім нумары, адказны спецыяліст “Слонімгаза” так і не патлумачыла. Канструктыўнай размовы не атрымалася.
Старшыні райвыканкама Андрэю Садоўскаму заяўніца паскардзілася, што яе не так абурыла адмова, як абыякавыя адносіны спецыяліста да ўзніклай праблемы. Разам з тым, на прынцыпе кантрасту жыхарка сталіцы папрасіла выказаць глыбокую ўдзячнасць медыцынскай работніцы з Дзятлаўшчыны – Алене Аляксандраўне Якубоўскай – “доктару ад Бога, якая, здаецца, лечыць сваіх пацыентаў не толькі медыцынскімі сродкамі, але і ўважлівымі адносінамі, цярплівасцю, цёплымі словамі падтрымкі”. Такімі, на думку заяўніцы, і павінны быць спецыялісты ўсіх адказных службаў.
Кіраўнік раёна паабяцаў жыхарцы сталіцы адрасаваць яе пытанне ў Дзятлаўскі раён газазабеспячэння і адразу пасля размовы патэлефанаваў начальніку арганізацыі Юрыю Ганчару.
Юрый Іванавіч патлумачыў, што сапраўды на Дзятлаўшчыне нязначная колькасць жыхароў негазіфікаваных вёсак яшчэ карыстаецца газам у балонах. Выезды па іх замене насельніцтву ажыццяўляюцца цэнтралізавана паводле графіка. Каб моцна ад яго не залежаць, многія грамадзяне ўстанаўліваюць у сваіх домаўладаннях не адну, а дзве спецыяльныя шафы з балонамі. Канчаецца “блакітнае паліва” ў адным – пераключаюцца на другі да выканання заяўкі.
Такі парадак дастаўкі газавых балонаў склаўся на ўсёй тэрыторыі Рэспублікі Беларусь, таму неабходна ўстанаўліваць двухконтурныя шафы, а дапамагчы ў гэтым сваім бацькам павінны іх дзеці.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
