Бытавая тэхніка не бывае асабліва даўгавечнай. Калі яна не паспявае паламацца, то старэе нават у ідэальных умовах.
Як жа пазбавіцца ад старой бытавой тэхнікі?
У нашым раёне РУП ЖКГ і Дзятлаўскі філіял Гродзенскага аблспажыўтаварыства прадастаўляюць паслугі насельніцтву па вывазе буйна-, сярэдне- і дробнагабарытнага электрычнага і электроннага абсталявання (бытавой тэхнікі).
Да буйнагабарытнага абсталявання адносяцца халадзільнікі, маразільнікі, пральныя, посудамыйныя і сушыльныя машыны, газавыя і электрычныя пліты і іншае абсталяванне, габарыты якога ў суме трох вымярэнняў складаюць больш за 160 см.
Сярэднегабарытнымі лічацца тэлевізары, маніторы, сістэмныя блокі камп’ютараў, прынтараў, капіравальных машын, сканераў, ноўтбукаў, кандыцыянераў, вентылятараў, ЗВЧ-печаў, абагравальнікаў, пыласосаў і іншага абсталявання, габарыты якога ў суме трох вымярэнняў складаюць ад 80 да 160 см.
Да дробнагабарытнай тэхнікі – уся тэхніка, габарыты якой у суме трох вымярэнняў складаюць да 80 см уключна.
Сёння можна перадаць бясплатна Дзятлаўскаму РУП ЖКГ адходы бытавой тэхнікі двума спосабамі.
- Самастойна даставіць у прыёмныя пункты РУП ЖКГ: г. Дзятлава, вул. Навагрудская, 4; г. п. Наваельня, завулак Снітко, 3 А; аг. Гезгалы, д. 9 А; г. п. Казлоўшчына, вул. Азёрная, 16. Рэжым работы пунктаў: панядзелак – пятніца з 8 да 17 гадзін.
- Па папярэдняй заяўцы па нумары тэлефона 6-68-36. РУП ЖКГ выдзеліць транспарт (у буднія дні з 8 да 17 гадзін) для вывазу тэхнікі. Аплата за транспартныя паслугі не прадугледжана.
Дзятлаўскі філіял Гродзенскага аблспажыўтаварыства прыём адходаў электрычнага і электроннага абсталявання ажыццяўляе праз прыёмна-нарыхтоўчы пункт, які знаходзіцца па адрасе: г. Дзятлава, вул. Слонімская, 34 (у буднія дні з 8 да 17 гадзін) па цане 25 капеек за кілаграм. Для тых, у каго няма магчымасці арганізаваць самастойную дастаўку, прадугледжана паслуга па бясплатным вывазе. Прычым такая прапанова актуальная для ўсіх населеных пунктаў раёна. Заяўку можна аформіць па нумары 6-15-28.
УВАГА! Тэхніка прымаецца толькі ў неразабраным выглядзе.
Аддзел жыллёва-камунальнай гаспадаркі, архітэктуры і будаўніцтва райвыканкама
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
