Падарожжа ў сталіцу Беларусі

Важнае Грамадства

Вучні 1-8 класаў Дварэцкай сярэдняй школы – актыўныя падарожнікі, яны пабывалі ў многіх гарадах нашай Беларусі.

На гэты раз яны адправіліся на экскурсію ў горад Мінск. Першым іх прыпынкам стаў музей Вялікай Айчыннай вайны. У суправаджэнні экскурсавода дзеці пазнаёміліся з цікавымі экспазіцыямі музея, атрымалі шмат карыснай інфармацыі аб подзвігах нашых суайчыннікаў у час Другой сусветай вайны, пачулі рэальныя гісторыі з жыцця і барацьбы беларускага народа. Вельмі зацікавіла вучняў аб’ёмная панарама “Захоп Мінска”, экспазіцыя ваеннай тэхнікі і зброі: знакамітая “Кацюша”, танкі, стралковая і артылерыйская зброя, ваенна-транспартны самалёт, а таксама  ўзнагароды ўдзельнікаў Вялікай Айчыннай вайны.

Уразіла вучняў і экспазіцыя, якая расказвала аб удзеле беларусаў у вызваленні краіны. А завяршыўся экскурсійны маршрут залай Перамогі, дзе аб’ядналіся Памяць і Слава пра подзвіг  народа ў гады вайны.

Падарожжа юных экскурсантаў прадоўжылася на мемарыял “Востраў Слёз”, які створаны ў гонар беларускіх салдат, якія выконвалі свой інтэрнацыянальны доўг ў Афганістане. Там у спісе знайшлі і прозвішча земляка Дзмітрыя Лазовіка. Яго імя носіць піянерская дружына школы.

Успаміны пра незабыўнае падарожжа застануцца ў фотаздымках, зробленых у час экскурсіі.

Ірына ЛЯЎШУК,
класны кіраўнік 8 класа Дварэцкай сярэдняй школы

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga