16 верасня ў раёне прайшоў Адзіны дзень інфармавання насельніцтва.
Інфармацыйна-прапагандысцкая група пад кіраўніцтвам начальніка аддзела ідэалагічнай работы, культуры і па справах моладзі райвыканкама Вольгі Рагачовай сустрэлася з калектывам прадстаўніцтва “Белдзяржстрах” па Дзятлаўскім раёне, абмеркавалі актуальныя тэмы.
Вольга Рагачова пазнаёміла ўдзельнікаў сустрэчы з гісторыяй Дня народнага адзінства, які сёлета ўпершыню адзначаецца ў нашай краіне.
– Беларускі народ ніхто не здолее падзяліць супраць яго волі, – яна прывяла словы кіраўніка краіны Аляксандра Лукашэнкі.
Начальнік АУС Дзятлаўскага райвыканкама Аляксандр Біль засяродзіў увагу на актуальных пытаннях супрацьдзеяння экстрэмізму. Калі раней гэта праблема не была вострай для беларусаў, то ў святле негатыўных падзеяў мінулага года беларускае заканадаўства было значна дапоўнена артыкуламі, звязанымі з пакараннем за дзеянні, выказванні і распаўсюджанне інфармацыі экстрэмісцкага характару. Падобныя крымінальныя і адміністрацыйныя справы былі і ў нашым раёне.
– Не забывайце пра тое, што адкрытая пагроза жыццю чалавека і яго блізкіх, выказаная вусна, пісьмова або на прасторах Інтэрнэту, строга караецца па законе, – нагадаў Аляксандр Францавіч.
Ён расказаў аб мерах па супрацьдзеянні незаконнаму абароту наркотыкаў, прафілактыцы наркаманіі. Дакладчык адзначыў, што праблема спажывання і нават збыту наркатычных сродкаў, на жаль, мае месца і на Дзятлаўшчыне.
Аб мерах супрацьпажарнай прафілактыкі ў сувязі з надыходам ацяпляльнага сезона ўдзельнікам сустрэчы расказаў начальнік раённага аддзела па надзвычайных сітуацыях Сяргей Казушчык. Ён папрасіў прысутных не пакінуць сам-насам пажылых бацькоў, якія карыстаюцца пячным ацяпленнем, дапамагчы ім з падрыхтоўкай і праверкай сістэмаў ацяплення, электраправодкі. Выступоўца закрануў пытанне навядзення парадку на зямлі, нагадаўшы аб мерах пажарнай бяспекі і катэгарычнай забароне выпальвання сухой травы.
З актуальнай эпідэміялагічнай сітуацыяй у раёне пазнаёміла галоўны доктар Дзятлаўскага райЦГЭ Алена Шайбак.
– Вакцынацыя – самы эфектыўны спосаб супрацьдзеяння каранавіруснай інфекцыі, – падкрэсліла яна ў сваім выступленні. – На мэце – прышчапіць звыш 60 % насельніцтва раёна, што дапаможа стварэнню калектыўнага імунітэту ад каранавіруснай інфекцыі.
На сёння актыўна правакцынаваліся медыкі, прадстаўнікі сілавых структураў і педагогі, да іх далучаюцца іншыя працоўныя калектывы раёна. Пры гэтым, на Дзятлаўшчыне фіксуецца пад’ём захворвання на вірусныя інфекцыі, а разам з ім – пад’ём і на COVID-19. Таму прышчапіцца, не адкладваючы на потым, – важнае рашэнне ў такіх абставінах.
У час Адзінага дня інфармавання насельніцтва паступіў шэраг пытанняў, якія тычыліся рэжыму работы раённай бальніцы ў сувязі з надзённай эпідэміялагічнай абстаноўкай, сітуацыі на аўтамабільных дарогах райцэнтра і навядзення парадку на плошчы 17 Верасня ў Дзятлаве, іншых тэм. Яны былі растлумачаны ў ходзе сустрэчы.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga