У любы сезон года, нягледзячы на канікулы, дашкольныя навучальныя ўстановы прымаюць сваіх маленькіх наведвальнікаў.
У яслях-садзе № 1 горада Дзятлава іх выхаваннем і развіццём займаюцца як вопытныя таленавітыя педагогі, так і маладыя спецыялісты, якія гарманічна ўвайшлі ў калектыў установы і добра зарэкамендавалі сябе. Сярод іх – ураджэнка Ваўкавыска, выхавальніца Ірына Нагорная.
– Ірына Васільеўна, як даўно працуеце на Дзятлаўшчыне? Якія ўражанні?
– Чатырнаццатага жніўня будзе год. Прыехала сюды пасля заканчэння Ваўкавыскага педагагічнага каледжа. Прыемна, што з першых крокаў у прафесіі “шэфства” нада мной узялі старэйшыя калегі – выхавальнікі Святлана Дубека і Людміла Станкевіч, якія падтрымлівалі і падказвалі. Самае складанае напачатку было напісанне планаў адукацыйнага працэсу, але паступова разабралася і з гэтым. З дзеткамі – адразу проста: мы вельмі хутка прывыклі адзін да аднаго. Дзеці любяць маладых педагогаў.
– Што падабаецца больш за ўсё ў працы?
– Самі дзеці з іх непасрэднасцю, адкрытасцю, яскравымі эмоцыямі. Стараюся многаму навучыць сваіх выхаванцаў і шчыра радуюся іх поспехам.
– Што важней для выхавальніка: любоў або дысцыпліна?
– Самае важнае – любоў да дзяцей, яны гэта адчуваюць і адклікаюцца. Аднак, і без дысцыпліны нам нікуды: у дашкольнай навучальнай установе дзеці рыхтуюцца да далейшага жыцця ў соцыуме, вучацца паважаць іншых, прытрымлівацца правілаў грамадства і заставацца шчырымі, сумленнымі.
– Ці падабаецца вам Дзятлава?
– Маленькі ціхі гарадок, пасля роднага Ваўкавыска крыху непрывычна. Тут жыву ў арэндаваным доме недалёка ад работы. Да таго ж, у дзіцячым садку вельмі падтрымлівае працоўны калектыў.
– Дзе бачыце сваю будучыню?
– Адназначна – у дашкольнай педагогіцы. Аднак, хацелася б у большым горадзе. Каб стаць на крок бліжэй да мары, буду сёлета паступаць у Гродзенскі дзяржаўны ўніверсітэт па сваёй спецыяльнасці. Хачу падзякаваць сваім калегам за тое, што падтрымалі маю ўпэўненасць у выбары прафесіі.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
