Зімовая спартакіяда-2021 прайшла сярод падраздзяленняў і філіялаў ААТ “Молочный Мир”.
Удзельнікі спартыўнага свята, якое ладзілася пад дэвізам “Сіла ў адзінстве!”, сустрэліся на базе санаторыя “Азёрны”. Зімовая лыжня сабрала 15 каманд, якія спаборнічалі на дыстанцыі ў два кіламетры.
На адкрыцці спартакіяды з віншавальным словам выступіла генеральны дырэктар ААТ “Молочный Мир” Марына Анікеева.
– Наша сіла – у адзінстве! Мы “Молочный Мир”, – аб’явіла Марына Яўгенаўна.
Каманды знаходзіліся на лыжні каля дзвюх гадзін. Балельшчыкі і госці таксама змаглі паўдзельнічаць у зімовых забавах: лыжы, катанне на каньках, санках, цюбінгах, боўлінг, плаванне ў аквапарку санаторыя – выбар быў на любы густ. Частавалі гарачай гарбатай у тэрмасах, а для дзяцей арганізавалі салодкі пачастунак.
Па выніках лыжнага забегу пераможцаў вызначылі як у камандным, так і ў асабістым заліку. Яны былі ўрачыста ўзнагароджаны дыпломамі і падарункамі, якія ўручала генеральны дырэктар прадпрыемства.
Так, пераможцам асабістага першынства сярод мужчын стаў Канстанцін Маркевіч, вадзіцель транспартнага цэху; другое месца заняў Аляксандр Сямашка, апаратчык вытворчасці сухіх малочных прадуктаў вытворчага цэху “Скідаль”; замкнуў тройку лідараў Аляксандр Рыгосік, сырароб па паспельванні сыроў вытворчага цэху “Бераставіца”.
У асабістым першынстве сярод жанчын лідзіравала Вольга Варабей, начальнік цэху па вытворчасці марожанага і сухіх малочных прадуктаў; другой на фінішы была Галіна Шкода, начальнік аддзела працы і заработнай платы Шчучынскага філіяла ААТ “Молочный Мир”; трэці вынік – у Кацярыны Чубоўскай, аператара ЭВМ.
Пераможцай каманднага першынства стала каманда Дзятлаўскага філіяла ААТ “Молочный Мир”; на другім месцы – каманда вытворчага цэху “Бераставіца”; трэцяе месца ў каманды вытворчага цэху “Скідаль”.
Пасля ўрачыстага закрыцця лыжні ўдзельнікі і госці свята правялі флэш-моб “Сіла ў адзінстве”. Каманды стаялі ў выглядзе пяці алімпійскіх кольцаў і выпусцілі ў неба рознакаляровыя паветраныя шары, як сімвал адзінства розных народаў і нацый, розных меркаванняў.
Мерапрыемства закончылася канцэртнай праграмай, дзе гучалі пранікнёныя вершы і песні пра сяброўства, мір, Радзіму, з гумарам праходзілі гульні, дэманстраваліся сцэнкі.
Спартыўнае свята ААТ “Молочный Мир” чакае ўсіх зноў роўна праз год!
Ірына СТЫРНІК
