Мерапрыемства, прысвечанае 32-гадавіне з дня вываду савецкіх войскаў з Афганістана прайшло ў Дзятлаўскім гісторыка-краязнаўчым музеі.
На сустрэчу запрасілі вучняў 9 класа гімназіі № 1 і ганаровых гасцей ‒ Аляксандра Юргеля і Алега Драгунскага, ветэранаў афганскай вайны.
Дакладна вядома, што праз баявыя дзеянні ў Афганістане прайшло 130 нашых землякоў, двое з якіх ‒ Аляксандр Шылаў і Дзмітрый Лазовік загінулі на чужой зямлі.
У знак памяці аб загінулых воінах-інтэрнацыяналістах вядучыя запалілі свечкі, пасля чаго прапанавалі хвіліну маўчання.
Асабліва кранальна прагучалі ўрыўкі з салдацкіх лістоў, якія вучні гімназіі зачыталі прысутным. У сваіх пасланнях воіны апісвалі звычайную службу ‒ такую, як і ва ўсіх, прасілі не перажываць за іх і не турбавацца.
Алег Драгунскі, старшыня Дзятлаўскай раённай арганізацыі “Беларускі саюз ветэранаў вайны у Афганістане” расказаў пра дзейнасць арганізацыі, асабістую службу сапёрам падчас вайны і салдацкія вучэнні.
У сваю чаргу, Аляксандр Юргель распавёў пра тыя мясціны, дзе яму ўдалося пабываць, прыгажосць прыроды Афганістана: мноства рознакаляровых цюльпанаў, спякотнае лета і моцныя навальніцы. Шмат гаварыў пра людзей, якіх там бачыў, а таксама пра салдацкі побыт:
‒ Мясцовыя жыхары сустракаліся розныя, ‒ успамінаў Аляксандр Васільевіч. ‒ Больш за ўсё здзіўляла тое, што яны памяталі сваякоў аж да сёмага калена.
Госці сустрэчы з цікавасцю распытвалі ветэранаў пра службу і выпадкі на вайне, разглядалі ўзнагароды. Напрыканцы мерапрыемства свой верш прачытала Алена Абрамчык, супрацоўніцы музея.
Марыя ПАПОВА