Саюзнай моладзі стала больш

Важнае Грамадства Свежыя навіны

З пачаткам новага навучальнага года грамадскае аб’яднанне “Беларускі рэспубліканскі саюз моладзі” па добрай традыцыі звяртаецца да шырокамаштабнага праекта “У саюз з сябрамі” і запрашае ў свае шэрагі актыўных, крэатыўных, сумленных, неабыякавых да лёсу Радзімы маладых людзей ва ўзросце ад 14 да 31 года.

Падтрымліваецца такая традыцыя і на Дзятлаўшчыне. Так, 4 верасня ў Новаяльнянскую сярэднюю школу завітала першы сакратар раённай арганізацыі ГА “БРСМ” Кацярына Хілімончык, каб ва ўрачыстай абстаноўцы ўручыць членскія білеты аб’яднання сямі навучэнцам установы.

У час сустрэчы моладзевы лідар Дзятлаўшчыны расказала, што Беларускі рэспубліканскі саюз моладзі аб’ядноўвае сотні тысяч энергічных, таленавітых, творчых, спартыўных маладых людзей ва ўсіх кутках нашай краіны. Дзясяткі тысяч з іх з’яўляюцца ўдзельнікамі студэнцкіх атрадаў, моладзевых атрадаў аховы правапарадку, валанцёрамі БРСМ “Добрае Сэрца”. Толькі ў нашым раёне функцыянуюць 48 пярвічных арганізацый ГА “БРСМ”, у якія ўваходзяць 842 маладыя чалавекі. Саюз моладзі – вялікая сям’я аднадумцаў, якія не сядзяць склаўшы рукі, а скіроўваюць свае сілы і здольнасці на тое, каб зрабіць жыццё больш цікавым, яркім, асэнсаваным. Шматлікія конкурсы, спаборніцтвы, цікавыя паездкі і экскурсіі – вось што чакае нераўнадушных рабят, якія ўступаюць у моладзевую арганізацыю.

У пацвярджэнне сваіх слоў Кацярына Хілімончык уручыла граматы раённага камітэта ГА “БРСМ” за актыўны ўдзел у дзейнасці арганізацыі навучэнцам Новаяльнянскай сярэдняй школы Алене Ходар, Раману Кучынскаму, Ільі Гранкоўскаму. Моладзевы лідар пажадала вучням быць актыўнымі і паспяховымі, унесці свой пасільны ўклад у стварэнне шчаслівай будучыні роднай Беларусі.

Ірына КАЎКЕЛЬ