З 17 па 20 верасня, згодна з распараджэннем начальніка Генеральнага штаба Узброеных Сіл – першага намесніка Міністра абароны Рэспублікі Беларусь, на Дзятлаўшчыне праводзілася раптоўная праверка мабілізацыйнай гатоўнасці раёна.
Раніцай 17 верасня адна з вайсковых часцей, якая дыслакуецца на тэрыторыі Гродзеншчыны, атрымала распараджэнне на фарміраванне. Праз ваеннага камісара Гродзенскай вобласці ваенны камісарыят Дзятлаўскага раёна атрымаў распараджэнне на дастаўку ваеннаабавязаных, прыпісаных да гэтай вайсковай часці, і сумесна з сельскімі выканаўчымі камітэтамі прыступіў да выканання пастаўленай задачы.
Літаральна праз некалькі гадзін для абвесткі ваеннаабавязаных былі разгорнуты і падрыхтаваны да работы ўчастак абвесткі ў Дзятлаве і пункты збору і адпраўкі сельвыканкамаў. Грамадзян абвяшчалі праз уручэнне персанальных павестак па месцы жыхарства і работы.
На наступны дзень у 8 гадзін на пункт збору прыбылі афіцэры запасу, якія ў 10 гадзін выехалі на пункт прыёму асабовага саставу вайсковай часці. 20 верасня была скончана адпраўка ў часць сяржантаў і салдат.
Асабовы састаў базы мабілізацыйнага разгортвання раёна спрацаваў зладжана і ў поўным аб’ёме выканаў задачу па ўкамплектаванні воінскіх каманд ваеннаабавязанымі адпаведна воінскім пасадам.
Генадзь СУРАВЕЦ,
ваенны камісар Дзятлаўскага раёна
Ваеннаабавязаныя, якія прыбылі на пункт збору, падзяліліся ўражаннямі ад удзелу ў раптоўнай праверцы мабілізацыйнай гатоўнасці.
Сяргей Луня, слесар-мантажнік ААТ “Гроднагазбудізаляцыя”:
– Настрой бадзёры. Гэта мае першыя зборы пасля праходжання ў 1993 годзе тэрміновай ваеннай службы. Армейскія будні праходзілі ў дэсантна-штурмавой брыгадзе ў горадзе Брэсце. Успаміны пра той час засталіся станоўчыя, падтрымліваю сувязь з армейскімі сябрамі. Мяркую, што цяпер не лішне будзе “патрэніраваць” ранейшыя навыкі. Лічу, што служба дысцыплінуе, таму і свайго сына-школьніка настройваю на службу ў арміі. Там юнакі становяцца больш самастойнымі, загартаванымі. Моладзі не варта баяцца прызыву, мы таксама не баімся зноў стаць у строй.
Сяргей Ерамейчык, КСУП “Слава працы”:
– У мяне трое сыноў, значыць, будзе каму расказваць аб уражаннях, калі вярнуся са збораў. Тэрміновую службу я праходзіў у Коласава, у ракетных войсках. Гэта быў 1993 год. З таго часу больш не прызываўся. Мяркую, цікава будзе пабачыць, як за апошнія гады памянялася армія, віды ўзбраення, форма. Лічу, што служыць ганарова, а армія дысцыплінуе і дапамагае па-іншаму ацаніць сябе, свае здольнасці, сваё жыццё.
Ірына СТЫРНІК