Штогод у апошнюю нядзелю чэрвеня на Дзятлаўшчыне праходзяць святочныя мерапрыемствы, прымеркаваныя да Дня моладзі.
Сёлета свята для маладых і ініцыятыўных, творчых і таленавітых дзятлаўчан і гасцей горада прайшло 30 чэрвеня на адкрытай пляцоўцы Дзятлаўскага цэнтра культуры і народнай творчасці. Масавы ўдзел у свяце прынялі юнакі і дзяўчаты, іх бацькі, старэйшыя дзеці і зусім маленькія жыхары раёна.
На працягу ўсяго святочнага мерапрыемства настрой для маладога пакалення і іх бацькоў стваралі артысты сектара па рабоце з моладдзю Дзятлаўскага цэнтра культуры і народнай творчасці, а таксама маладыя выканаўцы.
У рамках акцыі “Заспяваем разам” ладзіўся конкурс на веданне сучасных песенных кампазіцый і песень мінулага стагоддзя.
Для аматараў творчага баўлення часу быў арганізаваны конкурс малюнкаў на асфальце, у якім прынялі ўдзел маленькія жыхары горада разам са сваімі бацькамі. Конкурс праходзіў з нагоды святкавання дзвюх юбілейных датаў – 75-годдзя вызвалення Беларусі ад нямецка-фашысцкіх захопнікаў і 75-годдзя стварэння Гродзенскай вобласці. У конкурсе на самы лепшы малюнак перамагла сям’я Сіняк – мама Iлона і яе сыночкі Станіслаў і Уладзіслаў. Пераможцы атрымалі ў падарунак паветраныя шары і іншыя прыемныя сюрпрызы, паветраныя шары дасталіся і астатнім удзельнікам конкурсу.
На працягу ўсяго мерапрыемства працавалі выставы-продажы і зоны адпачынку, дзе можна было пакатацца на надзіманых горках, набыць салодкую вату і папкорн.
Аксана АНДАЛЮКЕВІЧ