Падарункі і цёплыя словы – ветэранам педагагічнай справы

Важнае Культура і адпачынак Свежыя навіны

Здаецца, няма больш адказнай і творчай прафесіі, чым прафесія настаўніка. Школа для педагогаў і іх вучняў – родны дом, і толькі яны маюць там пастаянную прапіску.

На Дзятлаўшчыне з гадамі ўсталявалася добрая традыцыя: напярэдадні Дня пажылых людзей і Дня настаўніка ўшаноўваць ветэранаў педагагічнай працы. 2018 год таксама не стаў выключэннем.

Святочная пляцоўка ў актавай зале сярэдняй школы №1 стала месцам сустрэчы  былых калег.

Першай людзей мудрай  прафесіі і залатога ўзросту, гасцей свята павіншавала Раіса Ганчарэвіч, старшыня раённага савета ветэранаў педагагічнай працы. Раіса Аляксандраўна зазначыла, што гэта свята заўсёды збірае людзей з багатай душой, каласальным вопытам, самаадданасцю, невычэрпным запалам.

Падзячныя лісты  раённага Савета дэпутатаў і раённага выканаўчага камітэта за шматгадовую добрасумленную працу, за асобасны ўклад у развіццё падрастаючага пакалення ўручыў старшыня Дзятлаўскага раённага Савета дэпутатаў Аляксандр Бараноўскі.

Са словамі віншаванняў да прысутных звярнуліся старшыня раённай арганізацыі Беларускага прафсаюза работнікаў адукацыі і навукі Станіслаў Фабішэўскі, намеснік начальніка аддзела адукацыі Дзятлаўскага райвыканкама, старшыня раённай арганізацыі грамадскага аб’яднання “Беларускі саюз жанчын” Алена Жадзейка, намеснік старшыні раённага савета ветэранаў В Абухаў.

Яны ўручылі Ганаровыя граматы, Падзячныя лісты і каштоўныя падарункі заслужаным і актыўным настаўнікам-пенсіянерам. 

Сваіх калег педагогаў-ветэранаў павіншавала намеснік старшыні раённага савета ветэранаў педагагічнай працы Яўгенія Савань. Яна ўручыла настаўнікам-пенсіянерам падарункі ад удзячных вучняў і ветэранскай арганізацыі.

Свята прадоўжыла традыцыйнае віншаванне юбіляраў, якія сёлета адсвяткавалі 90, 80, 70, 60-я дні нараджэння. Віноўнікі мерапрыемства атрымалі падарункі ад спонсараў сустрэчы і паўдзельнічалі ў бліц-апытанні: узгадалі работу ў школе, сваіх вучняў, расказалі аб прафесіі педагога, падзяліліся яскравымі і гумарыстычнымі ўспамінамі.

Пранікнёнымі словамі ветэранаў педагагічнай працы віншавалі іх  выхаванцы. У адрас былых настаўнікаў прагучала многа цёплых слоў і пажаданняў, былі ўручаны кветкі.

Яскравыя эмоцыі і добры настрой сваімі выступленнямі прысутным дарылі педагогі і навучэнцы сярэдняй школы №1 горада Дзятлава, работнікі Цэнтра культуры і народнай творчасці.

Пастараліся не адставаць ад  выканаўцаў канцэртнай праграмы і самі педагогі-ветэраны. Яны ўздымалі настрой вершамі ўласнага сачынення, песнямі, цёплымі словамі.

Спрыялі добраму настрою прысутных выстаўкі фотаздымкаў і насценгазетаў, створаных умелымі рукамі  былых настаўнікаў.

Як усе мы дзеці сваіх бацькоў, так і ўсе мы – вучні сваіх настаўнікаў. Кожнаму, здаецца, ёсць каго павіншаваць у гэты дзень, ёсць каму падзякаваць за навуку, якая дапамагла ісці па дарослым жыцці.

Аксана АНДАЛЮКЕВІЧ



Добавить комментарий

Ваш e-mail не будет опубликован. Обязательные поля помечены *