Ад Года навукі – да Года малой радзімы
Опубликовал

Ад Года навукі – да Года малой радзімы

У суботу, 3 сакавіка, адбылася ўрачыстая цырымонія закрыцця Года навукі ў Дзятлаўскім раёне.

Перад пачаткам цырымоніі ў фае Цэнтра культуры і народнай творчасці ладзілася выстава навуковых інавацыйных пректаў, якія прадставілі Цэнтр творчасці дзяцей і моладзі, гімназія, сярэднія школы №1 і №3 горада Дзятлава, Наваельнянская і Вензавецкая сярэднія школы.

Шмат педагогаў, навучэнцаў і іх бацькоў сабралася ў раённым Цэнтры культуры, каб падвесці вынікі Года навукі ў Дзятлаўскім раёне, падзяліцца сваімі поспехамі і дасягненнямі, атрымаць заслужаныя ўзнагароды.

Павітаў усіх удзельнікаў мерапрыемства старшыня Дзятлаўскага раённага Савета дэпутатаў Аляксандр Бараноўскі.

Ён зазначыў, што Год навукі ў нашым раёне прайшоў цікава, а самае галоўнае – вынікова, падзякаваў ўсім, хто плённа працаваў, пажадаў усім дабрабыту, удачы і новых здзяйсненняў.

Узгадалі сёння і імёны знакамітых дзятлаўчан – выпускнікоў школ раёна, якія дасягнулі высокіх вынікаў у розных галінах навукі.

Пачынаючы з 2008 года 16 навучэнцаў і 2 педагогі нашага раёна атрымалі ўзнагароды спецыяльнага фонду Прэзідэнта Рэспублікі Беларусь па сацыяльнай падтрымцы адораных і таленавітых навучэнцаў і студэнтаў і ўнесены ў рэспубліканскі банк. Выступіла стыпендыятка гэтага фонду Марыя Каско.

Былі ўзгаданы сёння і 15 навучэнцаў школ Дзятлаўшчыны, якія атрымлівалі ў розныя гады прэмію Аляксандра Дубко. У свой час яе атрымаў Дзмітрый Кузьма, які выступіў перад прысутнымі.

Галоўная місія сённяшняга мерапрыемства – ушанаванне маладых дараванняў, іх педагогаў і бацькоў, якія дасягнулі высокіх вынікаў у Год навукі. Для ўручэння ўзнагарод на сцэну запрасілі начальніка аддзела адукацыі, спорту і турызму Дзятлаўскага райвыканкама Наталлю Белаус. Яна ўручыла Падзячныя лісты настаўнікам за прафесійную кампетэнтнасць, распрацоўку інавацыйных і варыятыўных методык, творчы падыход да справы, выніковы ўдзел у алімпіядах, выставах, конкурсах сярод педагогаў.

Таксама Падзячныя лісты атрымалі педагогі за важкі ўклад у падрыхтоўку навучэнцаў да алімпіядаў, конкурсаў, эфектыўную работу з адоранымі навучэнцамі, дзейнасць па павышэнні якасці адукацыйнага працэсу.

Падзячныя лісты атрымалі педагогі за далучэнне навучэнцаў да захавання гісторыка-культурнай спадчыны малой радзімы, фарміраванне ў падрастаючага пакалення грамадзянскасці і патрыятызму, развіццё матывацыі да актыўнага ўключэння ў пошукава-даследчую дзейнасць.

За дапытлівасць, праяўленне цікавасці да вучэбных прадметаў, працалюбства, настойлівасць у дасягненні мэтаў, высокія вынікі ў вучэбнай дзейнасці, алімпіядным руху, навукова-даследчай рабоце Падзячныя лісты атрымалі навучэнцы школ раёна, а таксама іх бацькі за стварэнне ўмоваў для інтэлектуальнага і творчага развіцця дзяцей, прывіццё ім працалюбства, дапытлівасці, падтрымку творчых пачынанняў.

Цудоўны настрой усім прысутным дарылі артысты раёна.

Год навукі завяршыўся, і радасна ад таго, што ён упісаў новыя імёны ў гісторыю нашай Дзятлаўшчыны. Сёння быў дадзены старт Году малой радзімы. Няхай гэты год стане стымулам для кожнага праявіць стваральную ініцыятыву.

Святлана ГРЫШЫНА

Фота Юліі БАКУНОВІЧ

5 0 1257 03 Март, 2018 Раённыя падзеі, Самае чытаемае Март 3, 2018

Добавить комментарий

Ваш e-mail не будет опубликован. Обязательные поля помечены *