З набліжэннем навагодніх святаў у дарослых і дзяцей узнікае жаданне часцей скарыстацца хлапушкамі, петардамі або феерверкамі. Набыццё, а тым больш выкарыстанне няякасных піратэхнічных вырабаў, а таксама невыкананне інструкцыі па выкарыстанні і захоўванні вырабаў можа прывесці да сур’ёзных наступстваў – пажараў і траўмаў.
Напярэдадні святаў работнікі Дзятлаўскага аддзела па надзвычайных сітуацыях праводзяць навучанне асобаў, якія гандлююць піратэхнікай, па праграме пажаратэхнічнага мінімуму, а таксама маніторынгі месцаў продажу і захоўвання піратэхнічных вырабаў.
Некалькі парадаў пакупнікам піратэхнікі:
- пры пакупцы піратэхнічных вырабаў звяртайце ўвагу на тэрміны прыдатнасці, патрабуйце ў прадаўца сертыфікат адпаведнасці піратэхнічнага вырабу, інструкцыю па выкарыстанні;
- захоўвайце іх далей ад награвальных прыбораў, у недаступных для дзяцей месцах;
- не выкарыстоўвайце піратэхнічныя вырабы, у якіх ёсць дэфекты, паблізу жылых дамоў, пры моцным ветры, у памяшканнях, а таксама не дазваляйце дзецям карыстацца імі;
- фітыль варта падпальваць на адлегласці выцягнутай рукі;
- не нахіляйцеся над піратэхнічнымі вырабамі ў час іх выкарыстання, не запускайце паўторна, калі не спрацаваў фітыль;
- не выкарыстоўвайце піратэхніку, знаходзячыся ў стане алкагольнага ап’янення.
Д. БОБІН,
інспектар Дзятлаўскага РАНС
