У лесе нарадзілася — у доме спатрэбілася
Опубликовал

У лесе нарадзілася — у доме спатрэбілася

Пах ігліцы ў доме стварае асаблівую пераднавагоднюю атмасферу, а ўпрыгожваць сапраўдную елку значна цікавей, чым штучную. Дзе ў нашым горадзе можна набыць «жывую» елку і ці будзе «кусацца» цана на калючую прыгажуню?
На гэтыя і іншыя пытанні карэспандэнтцы газеты адказаў намеснік дырэктара Дзятлаўскага лясгаса Іван Скварчынскі.

— Іван Іосіфавіч, дзе дзятлаўчанам можна купіць елку?

Продаж навагодніх дрэваў іглічных парод будзе ажыццяўляцца штодня без выхадных з 21 па 31 снежня з 10 да 18 гадзін на пляцоўке паміж магазінамі «Венера» і «Дзяжурны» ў Дзятлаве. Кожны жадаючы зможа набыць навагодняе дрэва і на тэрыторыі адміністрацыйных будынкаў дзяржаўнай лесагаспадарчай установы «Дзятлаўскі лясгас» і кожнага лясніцтва.

— Ці хопіць дрэўцаў для ўсіх жадаючых?

У мінулым годзе было рэалізавана больш за 650 навагодніх дрэваў. Сёлета плануецца прадаставіць жыхарам і гасцям раёна дастатковую колькасць елак.

— А якія будуць цэны?

Навагодняе дрэва, напрыклад, вышынёй ад двух да трох метраў будзе каштаваць 10 рублёў 90 капеек на гандлёвай пляцоўцы і 8 рублёў 50 капеек у лясніцтве.

— Дзе ажыццяўляецца нарыхтоўка навагодніх іглічных дрэваў?

У адпаведнасці з артыкулам 80 Ляснога кодэкса Рэспублікі Беларусь дзяржаўная лесагаспадарчая ўстанова «Дзятлаўскі лясгас» ажыццяўляе нарыхтоўку дрэваў навагодніх іглічных парод у межах прадастаўленых участкаў ляснога фонду, а менавіта:
на спецыяльна створаных лясных плантацыях для вырошчвання дрэваў навагодніх іглічных парод;
пры правядзенні высечак догляду ў лясах з ліку дрэваў, якія высякаюцца ў адпаведнасці з дазвольнымі дакументамі і правіламі высечак лесу ў Рэспубліцы Беларусь;
у парадку расчысткі трас, прасек, палосаў адводу, ліній электраперадачы, на лесасеках галоўнага карыстання і суцэльных санітарных высечках, калі на дадзеных лесасеках маладняк не падлягае захаванню.

— Ці ёсць патрабаванні па якасці дрэваў?

Памеры і якасць навагодніх дрэваў іглічных парод, якія нарыхтоўваюцца, павінны адпавядаць устаноўленым для іх патрабаванням тэхнічных нарматыўна-прававых актаў.

Якую елку ставіць дома — жывую або штучную — вырашаць гаспадарам. Галоўнае, каб свята ўдалося.

Юлія БАКУНОВІЧ

0 0 85 14 Декабрь, 2017 Сацыяльная сфера Декабрь 14, 2017

Добавить комментарий

Ваш e-mail не будет опубликован. Обязательные поля помечены *