На працягу многіх гадоў у Рэспубліцы Беларусь рэгіструюцца выпадкі атручэння чадным газам пры эксплуатацыі бытавога газавага абсталявання і выкарыстанні пячнога ацяплення. Асноўнай прычынай атручэнняў з’яўляецца засмечванне дымавых і вентыляцыйных каналаў, і як вынік — адсутнасць цягі. Чадны газ, або вокіс вугляроду (СО), утвараецца пры няпоўным згаранні газу з-за недахопу кіслароду, неабходнага для хімічнага працэсу гарэння. Ён здольны пранікаць праз перагародкі, сцены, слаі глебы. Не паглынаецца порыстымі матэрыяламі, таму фільтруючыя процівагазы не абароняць ад атручэння чадным газам. Чадны газ — яд хуткага агульнатаксічнага дзеяння.
Якія сімптомы атручэння чадным газам?
Паколькі чадны газ не мае паху, смаку і колеру, ён не заўважны для чалавека, пры гэтым ад яго можна памерці за некалькі хвілін, калі канцэнтрацыя чаднага газу ў паветры больш за 1,28%. Таму ахвяры атручэння да апошняга моманту не падазраюць, што падпадаюць пад уздзеянне чаднага газу. Пачатковыя сімптомы ад слабой да сярэдняй ступені атручэння падобныя на сімптомы грыпу (але без тэмпературы): галаўны боль, стомленасць, млоснасць, галавакружэнне. Цяжкая ступень атручэння СО характарызуецца такімі сімптомамі, як зблытанасць прытомнасці, страта каардынацыі, ваніты, страта прытомнасці, смерць.
Як засцерагчы сябе і сваіх блізкіх ад чаднага газу? Перш за ўсё, неабходна ўтрымліваць у спраўным стане дымавыя і вентыляцыйныя каналы, што пацвярджаецца актам праверкі тэхнічнага стану, які выдае спецыялізаваная арганізацыя.
Адным з рашэнняў дадзенага пытання з’яўляецца ўстаноўка сучаснага бесправаднога дэтэктара чаднага газу. Ён вельмі просты ва ўстаноўцы і абслугоўванні. Дзякуючы выкарыстанню такога датчыка, гарантавана комплексная і сапраўды надзейная абарона ад дзеяння чаднага газу. Хаця тэхнічнымі нарматыўнымі прававымі актамі Рэспублікі Беларусь не прадугледжана ўстаноўка датчыкаў кантролю за ўтрыманнем колькасці чаднага газу ў паветры, аднак пра сваю бяспеку кожны павінен паклапаціцца сам. На рынку прадстаўлена вялікая колькасць датчыкаў і сігналізатараў чаднага газу ў шырокім цэнавым дыяпазоне.
Цяпер у Беларусі наладжаны выпуск датчыкаў чаднага газу, якія можна набыць у гандлёвай сетцы, акрамя таго, ёсць шэраг замежных аналагаў.
Так, напрыклад:
* апавяшчальнік газавы ІП 401-12Т, выпускаюць у горадзе Мінску, працуе ад звычайнай батарэйкі. Пры перавышэнні дапушчальных нормаў чаднага газу прыбор падае гукавы і светлавы сігналы. Мантаж ажыццяўляецца згодна з рэкамендацыямі завода-вытворцы. Прыблізны кошт прыбора складае 23 рублі. Яго можна набыць у Добраахвотным пажарным таварыстве ў Дзятлаве (вул. Лермантава, д. 32);
* газавы сігналізатар ЗОРД УСГ-1, выпускаюць у Мінску, працуе ад батарэек. Пры перавышэнні дапушчальных нормаў чаднага газу прыбор падае гукавы і светлавы сігналы. Просты ў мантажы. Прыблізны кошт прыбора — 26 рублёў.
Датчыкі чаднага газу ўстанаўліваюцца ў адпаведнасці з інструкцыяй завода-вытворцы. Датчыкі чаднага газу заўсёды былі і застаюцца прыборамі, якія спрацоўваюць перш, чым будзе нанесена шкода здароўю або жыццю.
Ніколі не ігнаруйце сігнал трывогі датчыка чаднага газу. Датчык папярэджвае аб патэнцыяльнай смяротнай небяспецы.
Адміністрацыя Дзятлаўскага раёна газазабеспячэння
