Інфармацыйна-адукацыйную акцыю пад такой назвай праводзяць раённы цэнтр гігіены і эпідэміялогіі, цэнтральная раённая бальніца. Мерапрыемствы прымеркаваны да Сусветнага дня барацьбы з віруснымі гепатытамі, які прыпадае на 28 ліпеня.
Вірусны гепатыт – група інфекцыйных хваробаў, якія выклікаюць вострую або хранічную хваробу печані. Ад яе штогод памірае амаль 1,5 мільёна людзей. Большасць трагічных зыходаў звязана з гепатытамі B і C.
У Дзятлаўскім раёне больш за 200 чалавек стаяць на дыспансерным уліку па захворваннях парэнтэральнымі віруснымі гепатытамі. У 2017 годзе зарэгістраваны 6 выпадкаў хранічнага віруснага гепатыту.
Гэтыя захворванні могуць быць папярэджаны, аднак большасць людзей не ведае, як трэба дзейнічаць. Заражэнне гепатытамі А і Е часцей за ўсё адбываецца праз брудныя ваду і харчовыя прадукты, пры кантакце з хворым на гепатыт у інкубацыйным і пачатковым перыядах хваробы. Гепатыт А сустракаецца паўсюдна, у той час як гепатыт Е – у асноўным у трапічных і субтрапічных рэгіёнах, у краінах Сярэдняй Азіі.
Гепатыты В, С і D перадаюцца парэнтэральна, гэта значыць, што вірус пранікае праз пашкоджаную скуру і слізістыя абалонкі пры ўнутрывенным увядзенні наркотыкаў, лячэбна-дыягнастычных маніпуляцыях, цяжарнасці і родах, палавых кантактах, бытавых мікратраўмах (манікюр, наколкі, галенне чужой брытвай і іншае).
Прафілактыка гепатытаў А і Е – гэта выкананне правілаў асабістай гігіены, ужыванне дабраякаснай пітной вады і харчовых прадуктаў.
Ад гепатытаў В і D абараняе вакцынацыя супраць гепатыту В. Такая вакцынацыя ў Рэспубліцы Беларусь уключана ў каляндар абавязковых дзіцячых прафілактычных прышчэпак. Прадугледжана таксама вакцынацыя дарослых і дзяцей, якія адносяцца да групаў высокай рызыкі заражэння гепатытам В: работнікаў аховы здароўя, якія маюць кантакт з крывёю і іншай біялагічнай вадкасцю чалавека; людзей, якія знаходзяцца на гемадыялізе або ў кантакце з хворымі на гепатыт.
Жыхары раёна, якія жадаюць атрымаць прафілактычныя прышчэпкі супраць віруснага гепатыту В, могуць яе атрымаць на платнай аснове. Для гэтага неабходна звярнуцца ў кабінет інфекцыйных захворванняў Дзятлаўскай раённай паліклінікі. Арыенціровачны кошт адной дозы вакцыны “Эувакс В” складае 18 рублёў. Для поўнай вакцынацыі неабходна ўвядзенне трох дозаў.
М. ДЗЯДОВІЧ,
доктар-эпідэміёлаг Дзятлаўскага райЦГЭ