2017 год — юбілейны год класікаў беларускай літаратуры Янкі Купалы і Якуба Коласа. 135-годдзе з дня іх нараджэння шырока адзначаецца ў нашай краіне і па-за яе межамі. Янка Купала і Якуб Колас – гэта сапраўдны пачатак усіх пачаткаў у беларускай культуры, літаратуры і мастацтве.
Ушанаваць выдатных паэтаў Беларусі, папулярызаваць іх творчасць, далучыць чытачоў да літаратурнай спадчыны класікаў – такая мэта мерапрыемстваў, якія будуць арганізаваны ў бібліятэках дзяржаўнай установы культуры “Дзятлаўская раённая бібліятэка”.
Напачатку ліпеня ў бібліятэках стартуе інфармацыйная акцыя “Песняры сінявокай Беларусі”, у рамках якой ладзяцца цікавыя і займальныя мерапрыемствы, электронныя прэзентацыі, гучныя чытанні, гадзіны паэзіі, конкурсы чытацкага майстэрства, літаратурныя вандраванні і іншае. Да ўвагі наведвальнікаў у бібліятэках арганізаваны кніжныя выставы, тэматычныя паліцы, выставы-юбілеі “Гонар і слава беларускай літаратуры”, выставы-прысвячэнні “Твае Песняры, Беларусь!”, выстава-свята “Песняры беларускай зямлі”. На працягу года выставы будуць папаўняцца новымі інфармацыйнымі матэрыяламі, артыкуламі з перыядычных выданняў аб песнярах зямлі беларускай і іх творах.
З нагоды юбілеяў класікаў беларускай літаратуры аддзел бібліятэчнага маркетынгу распрацоўвае інтэрнэт-праект “Песнярам роднай зямлі прысвячаецца”. Праект накіраваны на папулярызацыю чытання твораў класікаў і будзе размешчаны на сайце бібліятэкі www.libdyatlovo.grodno.by.
Класікі беларускай літаратуры Янка Купала, Якуб Колас – тыя велічыні сусветнай культуры пра якіх ніколі не будзе сказана апошняе слова, таму што кожнае пакаленне будзе зноў і зноў вяртацца да іх творчасці. Юбілейны год беларускіх песняроў працягваецца, а гэта значыць, што бібліятэкі раёна запросяць усіх, хто цікавіцца нацыянальнай літаратурай, на чарговыя мерапрыемствы.
Нельга пераацаніць таго, што зрабілі класікі беларускай літаратуры для сваёй краіны, спадчына якіх выклікае і будзе выклікаць цікавасць чытачоў. Творы іх з’яўляюцца залатым скарбам не толькі беларускай, але і сусветнай літаратуры. Яны непадуладны нават часу. Яны – вечныя.
М. БОРТКА,
метадыст аддзела бібліятэчнага маркетынгу