У Камітэце дзяржкантролю праведзена пасяджэне калегіі, на якой разгледжаны пытанні эфектыўнасці работы будаўнічых арганізацый вобласці.
Адзначана, што ў апошнія гады назіраецца зніжэнне долі ўкладу будаўнікоў у валавы рэгіянальны прадукт вобласці. Зніжаюцца аб’ёмы выкананых падрадных работ (за 2016 год тэмп росту — 80,2%, за студзень-красавік бягучага года — 95,2%). З году ў год не выконваецца ўстаноўленае заданне па ўводу аб’ектаў жыллёвага будаўніцтва, паказчык па тэмпе росту экспарту будаўнічых паслугаў. Пры гэтым асобнымі арганізацыямі не выконваюцца патрабаванні Указа №178 у частцы своечасовага паступлення валютнай выручкі.
У вобласці не арганізавана належным чынам работа па выкананні даручэнняў кіраўніка дзяржавы: па зніжэнні сабекошту, паляпшэнні фінансавага становішча арганізацый будаўнічай галіны і навядзенні парадку з разлікамі. Колькасць стратных будаўнічых арганізацый вобласці павялічылася да 51, у той час як да 2014 года стратнымі былі толькі адзінкі. Пры гэтым найбольш цяжкая сітуацыя склалася ў ГОСУП “Гроднааблсельбуд” і яго даччыных прадпрыемствах.
Таксама не выконваецца даручэнне кіраўніка дзяржавы па навядзенні парадку на тэрыторыях. Факты неналежнага ўтрымання тэрыторый і вытворчых будынкаў ўстаноўлены амаль ва ўсіх даччыных прадпрыемствах ГОСУП “Гроднааблсельбуд”.
Неспрыяльная сітуацыя склалася і ў вытворчасці будаўнічых матэрыялаў у вобласці, за 2016 год стратная работа ААТ “Шклозавод “Нёман”, ААТ “Гродзенскі шклозавод”, ААТ “Краснасельскбудматэрыялы”.
Не забяспечана выкананне даручэння кіраўніка дзяржавы па выкарыстанні не менш за 10% агульнага аб’ёму вырабляемага цэменту на дарожнае будаўніцтва. У 2016 годзе ў вобласці на гэтыя мэты выкарыстаны 23 тысячы тон цэменту або 47% ад даведзенага ўрадам задання.
На калегіі таксама была засяроджана ўвага на тым, што працягваюць выяўляцца факты завышэння кошту па аб’ектах будаўніцтва, уключаных у Дзяржаўную інвестыцыйную праграму, а таксама іншых аб’ектах, што фінансуюцца з бюджэту. За 2016 год выяўлена завышэнняў кошту будаўніча-мантажных работ на суму каля 900 тысяч рублёў, да адміністрацыйнай адказнасці прыцягнуты 36 юрыдычных асобаў і 62 фізічныя асобы на агульную суму штрафу ў 340 тысяч рублёў, сэканомлена бюджэтных сродкаў на суму каля 300 тысяч рублёў.
На калегіі таксама ўказана на неэфектыўнае выкарыстанне бюджэтных сродкаў пры закупках абсталявання, сыравіны, матэрыялаў у пасрэднікаў; на факты невыкарыстання распрацаванай і аплочанай за кошт сродкаў бюджэту праектна-каштарыснай дакументацыі, якая састарэла і неактуальная; несвоечасовасць выплаты заработнай платы.
Па выніках пасяджэння калегіі дадзены канкрэтныя даручэнні кіраўнікам будаўнічых арганізацый, выказаны прапановы на адрас Мінбудархітэктуры і аблвыканкама па забеспячэнні эфектыўнасці работы будіндустрыі Гродзеншчыны.
А. САДАЎНІЧЫ,
першы намеснік старшыні Камітэта дзяржкантролю Гродзенскай вобласці