Стан аўтамабільных дарог

КДК

Вынікі рэалізацыі мерапрыемстваў у Гродзенскай вобласці “Дзяржаўнай праграмы па развіцці і ўтрыманні аўтамабільных дарог у Рэспубліцы Беларусь на 2015-2019 гады” разгледжаны на калегіі Камітэта дзяржаўнага кантролю Гродзенскай вобласці, на якой адзначана недастатковая работа па забеспячэнні выканання ў вобласці прадугледжаных мерапрыемстваў дадзенай праграмы.

Практычна два гады ў Гродзенскай вобласці не былі вызначаны колькасць, віды і аб’ёмы работ, што выконваюцца ў рамках Дзяржаўнай праграмы на мясцовых аўтамабільных дарогах. Перашкодай для выканання мерапрыемстваў праграмы таксама з’явілася і сістэматычнае недафінансаванне са сродкаў абласнога бюджэту і пастаяннай затрымкі аплаты выкананых работ.

У вобласці застаецца вялікая колькасць мясцовых аўтамабільных дарог, стан якіх ацаніць як здавальняючы немагчыма, некаторыя дарогі, якія лічацца як з асфальтабетонным пакрыццём, можна назваць такімі толькі ўмоўна, бо на іх поўнасцю разбураны асфальтабетон.

Выяўлены факты неэфектыўнага выкарыстання бюджэтных сродкаў на выраб праектна-каштарыснай дакументацыі па 22 аб’ектах капітальнага і бягучага рамонтаў мясцовых аўтамабільных дарог, на стварэнне якой была выдаткавана ў 2000-2011 гадах 27,1 тысяча рублёў з бюджэту.

Не ўкаранёна да цяперашняга часу інавацыйная сістэма ўтрымання дарог на аснове дзяржаўных кантрактаў і нарматыўнага метаду.

Застаюцца актуальнымі пытанні рацыянальнага выкарыстання прадпрыемствамі прыродных рэсурсаў пры правядзенні дарожных работ, выкананні заканадаўства па абыходжанні з адходамі, унясення платы за праезд буйнагабарытнага, цяжкавагавага транспарту па дарогах агульнага карыстання, распараджэння маёмасці, а таксама зямельнага і падатковага заканадаўства.

Н. КРЫВІЦКАЯ,
намеснік старшыні Камітэта дзяржкантролю Гродзенскай вобласці



Добавить комментарий

Ваш e-mail не будет опубликован. Обязательные поля помечены *