Шосты школьны дзень павінен быць пабудаваны на інтарэсах дзіцяці, заявіла намеснік міністра адукацыі Раіса Сідарэнка на канферэнцыі «Актуальныя пытанні прафілактыкі правапарушэнняў» у Мінску, перадае карэспандэнт БЕЛТА. «Ва ўстановах адукацыі вядзецца пастаянная работа па ўдасканаленні шостага школьнага дня, праводзіцца конкурс на лепшую яго арганізацыю. Акцэнт, на якім мы настойваем, — гэта тое, што шосты школьны дзень павінен быць пабудаваны на інтарэсах дзіцяці, бацькоў, на індывідуальным падыходзе да кожнага вучня», — сказала Раіса Сідарэнка. Карысным у сувязі з гэтым будзе ўзаемадзеянне школы і ўстаноў прафесійнай, вышэйшай адукацыі. Размова ідзе аб запрашэнні школьнікаў у плане прафарыентацыі ў тую сферу, якая іх можа зацікавіць. «Сёння нашы шостыя школьныя дні будуць арыентаваны менавіта на тое, каб дзіця ў шосты школьны дзень атрымала канкрэтнае ўяўленне аб той прафесіі, якую яно можа атрымаць, а можа быць, і атрымала свае першасныя прафесійныя навыкі», — адзначыла намеснік міністра. На яе думку, дзіця не павінна заставацца адно. Трэба ствараць сітуацыю, калі школьнік будзе заняты цікавай яму справай. Важным напрамкам у гэтым плане з’яўляецца ўзаемадзеянне ўстаноў адукацыі са спартыўнымі грамадскімі аб’яднаннямі ў плане арганізацыі фізкультурна-аздараўленчай і спартыўна-масавай работы, у тым ліку ў шосты школьны дзень. Не менш цікавы вопыт развіцця прадпрымальніцтва ў маладзёжным асяроддзі. Цяпер невялікія вучэбныя бізнес-кампаніі з’явіліся ва ўсіх рэгіёнах краіны. Цудоўны вопыт — у Мінску і Мінскай вобласці. Такая практыка будзе пашырацца. Што датычыцца прафілактыкі правапарушэнняў, то гэта датычыцца ўсіх работнікаў у сістэме адукацыі. Але асноўная задача на плячах сацыяльна-педагагічнай і псіхалагічнай службаў установы адукацыі, і гэту работу трэба ўдасканальваць. Важна працаваць інакш — не па факце здарэння, а на папярэджанне. У міністэрстве гэта разумеюць і будуць перабудоўваць работу ў гэтым напрамку. Для ўдасканалення прафілактычнай работы па папярэджанні антыграмадскіх паводзін непаўналетніх у Міністэрстве адукацыі лічаць неабходным выключыць выпадкі іх адлічэння з устаноў адукацыі без згоды камісіі па справах непаўналетніх. Ужо ўносяцца адпаведныя змяненні ў Кодэкс аб адукацыі.