Калейдаскоп талентаў

Падзеі

У народзе пра таленавітых людзей кажуць, што ён таленавіты у многім. Прыклад таму — Наталля Губко, майстар канзашы з Хвінявічаў.
Канзашы — гэта толькі адно з захапленняў гэтай жанчыны. Умее яна яшчэ плесці з бісеру і газетных трубачак, вышываць крыжыкам, вырабляць дэкаратыўныя рэчы са звычайных пластыкавых бутэлек і лыжак. І нават шышкі — альховыя, яловыя і сасновыя — у руках майстра становяцца матэрыялам для стварэння дэкаратыўных кампазіцый.
Як лічыць сама Наталля, цяга да творчасці і рукадзелля дасталася ёй у спадчыну ад мамы, якой ужо, на жаль, няма ў жывых.

Губко
— Усё сваё жыццё мама працавала ў калгасе, — расказвае Наталля, — была даяркай на мясцовай ферме ў Раманавічах. У яе былі залатыя рукі. Яна вышывала і вязала кручком, спіцамі, прала і ткала. Памятаю, што ў школьным узросце спрабавала ткаць і я. У мяне гэта атрымлівалася.
Наталля нарадзілася ў вёсцы Калпінскія. Калі дзяўчынцы споўнілася шэсць гадоў, сям’я пераехала ў Раманавічы, дзе цяпер жыве бацька Наталлі.
Сама Наталля ўжо шмат гадоў разам з мужам жыве ў Хвінявічах. Працуе вартаўніком у мясцовай школе. Наведвае дэкаратыўны гурток ў мясцовым Доме культуры.
Да ўсяго гэтага варта дадаць, што Наталля яшчэ і выдатная гаспадыня, у доме якой заўжды  пануе чысціня і парадак.
А. ДУБРОЎСКАЯ
Фота аўтара



Добавить комментарий

Ваш адрес email не будет опубликован. Обязательные поля помечены *