Аб выніках праверкі дзяржаўнай установы

КДК

Камітэтам дзяржаўнага кантролю Гродзенскай вобласці праведзена праверка дзяржаўнай установы “Цэнтр культуры г. Гродна”, у ходзе якой устаноўлены шэраг парушэнняў заканадаўства.
Установай у 2013-2014 гадах не кампенсаваліся ўскосныя выдаткі за кошт пазабюджэтных сродкаў, атрыманых ад прадпрымальніцкай дзейнасці, неабгрунтавана завышана колькасць штатных ставак, у выніку чаго дапушчана выкарыстанне з парушэннем заканадаўства сродкаў гарадскога бюджэту ў агульнай суме 790 млн. рублёў.

Выяўлены факты выезду работнікаў ДУ “Цэнтр культуры г. Гродна” ў працоўны час за межы Рэспублікі Беларусь без афармлення загаду (распараджэння) наймальніка, а таксама без афармлення камандзіровачных пасведчанняў з зацверджанымі адзнакамі аб дні прыбыцця і дні выбыцця з месца камандзіравання, у выніку чаго таксама нанесена шкода ўстанове.

Устаноўлены факт неабгрунтаванага налічэння і выплаты заработнай платы работніку ўстановы, прынятага па сумяшчальніцтве на 0,5 стаўкі, бо графік работы на асноўным месцы работы супадаў з графікам па сумяшчальніцтве і работнік знаходзіўся на асноўным месцы работы, чым нанесена шкода ўстанове ў суме 18,4 млн. рублёў.

Варта адзначыць, што работнікі ўстановы ў выхадныя дні прыцягваліся па дагаворах падраду для выканання сваіх службовых абавязкаў на гарадскіх мерапрыемствах, у выніку чаго дадаткова налічана заработная плата за названы перыяд у суме 79,6 млн. рублёў, выплачана — 59,4 млн. рублёў. Акрамя таго, штатныя работнікі прыцягваліся па дагаворах падраду ў якасці асістэнта па ўручэнні ўзнагародаў (250 тыс. рублёў), удзельнікаў прадстаўнічай групы (350 тыс. рублёў), журы (ад 200 тыс. рублёў да 700 тыс. рублёў), паднашэнне прызоў для ўзнагароджання (250 тыс. рублёў).

У правяраемым перыядзе ДУ “Цэнтр культуры г. Гродна” неаднаразова звярталася ў консульства Рэспублікі Польшча і Літоўскай Рэспублікі з мэтай афармлення бясплатных гадавых візаў для ўдзельнікаў народных калектываў, а таксама для суправаджаючых асобаў дзіцячых калектываў.

Маюць месца факты ўключэння ў спісы ўдзельнікаў калектыву ўстановы фізічных асобаў, якія не ўваходзяць ні ў адзін з яго калектываў, для атрымання бясплатнай шэнген-візы.

Не забяспечана выкананне заканадаўства аб здачы ў арэнду дзяржаўнай маёмасці, не былі прыняты належныя меры па яго захаванні. Так, установай без узгаднення з уласнікам і на бязвыплатнай аснове ажыццяўлялася захоўванне маёмасці іншай арганізацыі, у выніку чаго ўпушчаная выгада ўстановы склала 119,5 млн. рублёў.
Не прымаліся належныя меры па эфектыўным выкарыстанні і ўвядзенні ў гаспадарчы абарот будынка па вул. Ажэшкі, 30 у г. Гродне, які з’яўляецца гісторыка-культурнай каштоўнасцю. Будынак прыбудовы (новы будынак) знаходзіцца ў нездавальняючым стане: дах працякае, падлога спарахнелая, месцамі адсутнічае падлогавае пакрыццё (паркет), цяпло, электраэнергія, водазабеспячэнне, ахоўна-пажарная сігналізацыя адсутнічаюць.

Па выніках праверкі шэраг вінаватых асобаў прыцягнуты да адміністрацыйнай і дысцыплінарнай адказнасці, па асобных фактах парушэнняў матэрыялы перададзеныя ў праваахоўныя органы.

В. ГЕРАСІМАЎ,
старшыня Камітэта дзяржкантролю па Гродзенскай вобласці



Добавить комментарий

Ваш адрес email не будет опубликован. Обязательные поля помечены *