Абарона насельніцтва ў надзвычайнай сітуацыі — задача дзяржаўнай важнасці. Надзвычайная сітуацыя — гэта заўсёды рэальная пагроза жыццю і здароўю людзей. У такіх абставінах важна своечасова інфармаваць грамадзян аб узнікненні або пагрозе небяспекі. Менавіта ад прынятых аператыўна дзеянняў залежыць, як вырашыцца сітуацыя.
Сёння для апавяшчэння насельніцтва выкарыстоўваюць сірэны, гучнагаварыльнікі, сродкі масавай інфармацыі і рассылку СМС-паведамленняў.
Асноўны сродак перадачы ўмоўнага сігналу аб небяспецы — электрычныя сірэны. Яны ўстаноўлены на тэрыторыі гарадоў і населеных пунктаў з такім разлікам, каб забяспечыць, па магчымасці, суцэльнае гукавое пакрыццё.
Яшчэ адзін эфектыўны элемент сістэмаў апавяшчэння насельніцтва — вулічныя гучнагаварыльнікі. У адрозненне ад электрасірэнаў, з дапамогай вулічных гучнагаварыльнікаў можна трансліраваць не толькі ўмоўны сігнал аб небяспецы, але і перадаваць маўленчыя паведамленні.
Пры дапамозе тэлебачання і радыёвяшчання насельніцтва таксама атрымлівае неабходную інфармацыю.
Усё часцей для апавяшчэння аб надзвычайных сітуацыях выкарыстоўваюць рассылку СМС-паведамленняў. Сёння мабільныя тэлефоны ёсць практычна ў кожнага жыхара рэспублікі, таму такі спосаб інфармавання набірае папулярнасць.
Нагадваем, што, калі вы пачулі сігнал сірэны, гэта азначае “Увага ўсім!”. Пачуўшы яго, варта ўключыць тэлевізар ці радыё і праслухаць экстранае паведамленне аб абставінах і парадку дзеянняў у іх. Калі папераджальны сігнал застаў вас на вуліцы — знайдзіце бліжэйшую тэле-, радыёкропку для атрымання больш падрабязных інструкцый. Рэкамендуецца трымаць уключанымі сродкі сувязі на працягу ўсяго перыяду ліквідацыі надзвычайнай сітуацыі і дзейнічаць згодна з указаннямі, якія паступілі.
А. БЕЛЕНКА,
інспектар Дзятлаўскага РАНС
