У Дзятлаўскім раённым цэнтры гігіены і эпідэміялогіі прайшло пасяджэнне «круглага стала», прымеркаванае да Сусветнага дня барацьбы са СНІДам.
Тэму абмеркавалі прадстаўнікі райЦГЭ, раённай бальніцы, раённага камітэта грамадскага аб’яднання «БРСМ», раённай бібліятэкі.
М. Дзядовіч, доктар-эпідэміёлаг:
— У Дзятлаўскім раёне на пачатак лістапада бягучага года зафіксаваны 8 выпадкаў ВІЧ-інфекцыі, два з іх выяўлены сёлета. Увогуле, па стане на 1 лістапада 2015 года ў Гродзенскай вобласці зарэгістраваны 838 выпадкаў ВІЧ-інфекцыі.
Нягледзячы на тое, што пад уздзеяннем віруса імунная сістэма паступова слабее, інфіцыраваны ВІЧ чалавек можа адчуваць сябе добра на працягу некалькіх гадоў, нават не падазраючы, што ў яго ВІЧ. Устанавіць наяўнасць захворвання дазволіць толькі тэсціраванне. Менавіта на гэта і звяртае ўвагу сёлетні Сусветны дзень барацьбы са СНІДам, які прайшоў па тэме «Праяві ініцыятыву — прайдзі тэст на ВІЧ».
Ж. Рэцько, доктар-інфекцыяніст:
— Ёсць пералік груп людзей, якія абавязкова павінны праходзіць абследаванне на ВІЧ. У гэтым спісе — донары крыві, жанчыны, якія становяцца на медыцынскі ўлік па цяжарнасці, дзеці, якія нарадзіліся ад ВІЧ-інфіцыраваных маці, замежныя грамадзяне, якія атрымліваюць беларускае грамадзянства або від на жыхарства.Больш падрабязна аб гэтым можна даведацца з адпаведнай пастановы Міністэрства аховы здароўя Рэспублікі Беларусь.
Любы жадаючы можа таксама прайсці тэсціраванне на ВІЧ, якое праводзіцца ананімна і канфідэнцыйна.
Н. Юрэня, валеолаг:
— У барацьбе з ВІЧ-інфекцыяй вельмі важная прафілактыка, інфармацыйная работа, асабліва сярод падлеткаў і моладзі. Яны павінны выхоўвацца на спрадвечных маральных каштоўнасцях. І работа ў гэтым накірунку павінна весціся намаганнямі сям’і, школы, грамадства ў цэлым.
А. Чурай, першы сакратар РК ГА «БРСМ»:
— Нездарма кажуць, што ўсё пачынаецца з сям’і. Менавіта таму выхаванне маральных каштоўнасцяў будучага пакалення першапачаткова павінна закладвацца ў гэтым асяродку.
Падрыхтавала да друку А. ДУБРОЎСКАЯ