ЕС выдзеліць 5 млн еўра на рэалізацыю ў Беларусі сумеснага з ПРААН праекта па развіцці мясцовых ініцыятыў

Сацыяльная сфера

Еўрасаюз да канца 2017 года выдзеліць 5 млн еўра на рэалізацыю ў Беларусі сумеснага з ПРААН праекта па развіцці мясцовых ініцыятыў. Аб гэтым, адказваючы на пытанне карэспандэнта БЕЛТА, паведаміла журналістам намеснік пастаяннага прадстаўніка ПРААН ў Беларусі Кацярына Паніклава да пачатку круглага стала «Устойлівае сацыяльна-эканамічнае развіццё пацярпелых у выніку катастрофы на ЧАЭС рэгіёнаў» у ходзе мерапрыемстваў у Гомелі акцыі «Экспрэс ААН-70».

Цяпер у Беларусі рэалізуецца сумесны праект ПРААН і ЕС «Мясцовае развіццё», разлічаны да 2017 года, які фінансуецца з бюджэту Еўрасаюза ў памеры 5 млн еўра. «Асноўная ідэя праекта — стварэнне стратэгіі развіцця рэгіёнаў і ўключэнне ў гэты працэс грамадзян. Нядаўна мы правялі конкурс мясцовых ініцыятыў, на які падалі заяўкі больш як 700 арганізацый, выканкамаў, проста жыхароў. Больш за ўсё заявак паступіла з Гомельскай вобласці. Яны датычацца, у прыватнасці, праектаў, якія павышаюць імідж рэгіёнаў, са стварэннем новых рабочых месц. Мы будзем аддаваць перавагу амбіцыйным і інавацыйным ініцыятывам, якія ў далейшым можна распаўсюдзіць на ўсю краіну», — сказала Кацярына Паніклава.

Яна дадала, што з 2016 года ПРААН пачынае ў Беларусі новую краінавую праграму, падрыхтаваную сумесна з урадам Беларусі. Яе бюджэт складае $82 млн, пэўная частка гэтых сродкаў будзе таксама накіравана на развіццё рэгіёнаў, якія пацярпелі ў выніку чарнобыльскай катастрофы. «Мы хацелі б, каб у працэс па ўстойлівым развіцці больш актыўна ўключаліся органы мясцовага самакіравання і мясцовыя жыхары. Каб па іх ініцыятыве рэалізоўваліся розныя праекты, у тым ліку і экалагічныя, абавязкова са стварэннем новых рабочых месц і павышаючыя імідж рэгіёнаў. Таксама разлічваем на развіццё больш цеснага дыялогу паміж дзяржавай і грамадзянамі. Гэтыя пытанні мы абмяркуем сёння ў час круглага стала. У будучым Праграма развіцця ААН будзе падтрымліваць не пілотныя аднадзённыя праекты, а тыя, якія будуць прыносіць карысць грамадзянам наступныя 5-10 гадоў», — растлумачыла намеснік пастаяннага прадстаўніка ПРААН.

З канца 90-х гадоў да 2011 года ПРААН рэалізавала каля сямі поўнамаштабных праектаў і ініцыятыў, накіраваных на развіццё пацярпелых у выніку аварыі на ЧАЭС тэрыторый, бюджэт якіх склаў $20 млн.

Круглы стол з удзелам прадстаўнікоў ААН, МНС Беларусі, Міністэрства аховы здароўя, Міністэрства эканомікі, НАН Беларусі, мясцовых органаў улады прадугледжвае выступленне дакладчыкаў па некалькіх тэмах, якія датычацца сучаснага этапу ў пераадоленні наступстваў чарнобыльскай катастрофы, эфектыўнай рэалізацыі міжнародных праектаў у забруджаных раёнах, уключэнне мясцовага насельніцтва ў працэс іх рэабілітацыі і ўстойлівага развіцця. Таксама сёння ўдзельнікі поезда ААН правядуць у Гомелі шэраг тэматычных дыскусій, семінараў, круглых сталоў, акцый, выставак і канцэртаў. Акцэнт у іх будзе зроблены на тэме зніжэння няроўнасці ўнутры краін і паміж імі.

Logo BelTA



Теги:

Добавить комментарий

Ваш адрес email не будет опубликован. Обязательные поля помечены *