Парушэнні парадку правядзення знешнегандлёвых аперацый

Падзеі

Камітэт дзяржкантролю пастаянна надае ўвагу пытанням экспарту беларускай прадукцыі. Адным з элементаў стымулявання экспарту з’яўляецца страхаванне экспартных рызык. Механізм экспартнага страхавання ўсё яшчэ працуе са скрыпам (удзельная вага страхавання экспартных рызык у агульным аб’ёме экспарту – не больш за 3%). Разам з тым, экспарцёры сутыкаюцца з праблемамі разлікаў за рэалізаваны тавар, што прыводзіць не толькі да недахопу ўласных абаротных сродкаў арганізацый, але і да парушэння дзеючага заканадаўства. Пра гэта сведчаць і вынікі кантролю за дзейнасцю суб’ектаў пры ажыццяўленні знешняга гандлю.

Пры правядзенні Камітэтам дзяржаўнага кантролю Гродзенскай вобласці ў студзені-маі бягучага года кантрольных мерапрыемстваў парушэнні парадку правядзення знешнегандлёвых аперацый устаноўлены ў 13 арганізацый.
За незабеспячэнне пры рэалізацыі знешнегандлёвых дагавораў своечасовага паступлення грашовых сродкаў пры экспарце тавараў або паступлення тавараў па імпарце або завяршэння знешнегандлёвых аперацый іншым прадугледжаным заканадаўчымі актамі спосабам у адпаведнасці з часткай 1 артыкула 11.37 Кодэкса Рэспублікі Беларусь аб адміністрацыйных правапарушэннях прадугледжана адміністрацыйная адказнасць як да суб’ектаў гаспадарання, так і да вінаватых фізічных асобаў.
Прычым памер штрафу значны і на фізічных асобаў складае да трыццаці базавых велічыняў (5,4 млн. рублёў), на юрыдычных асобаў — да двух працэнтаў ад сумы незавершаных ва ўстаноўлены тэрмін знешнегандлёвых аперацый за кожны дзень перавышэння тэрміну, але не больш за суму незавершаных знешнегандлёвых аперацый.
Па праверках бягучага года на юрыдычных асобаў накладзены штраф на агульную суму 10,6 млрд. рублёў, 14 фізічных асобаў прыцягнуты да адміністрацыйнай адказнасці на агульную суму 8,1 млн. рублёў.
З мэтай папераджальнага кантролю Камітэт дзяржаўнага кантролю Гродзенскай вобласці нагадвае суб’ектам гаспадарання аб неабходнасці захавання парадку правядзення знешнегандлёвых аперацый і аб магчымасці страхавання экспартных рызык у страхавой арганізацыі, што мінімізуе рызыкі ўзнікнення стратаў і прымяненне да суб’ектаў штрафных санкцый.
А. САДАЎНІЧЫ,
першы намеснік старшыні Камітэта дзяржкантролю Гродзенскай вобласці



Теги:

Добавить комментарий

Ваш адрес email не будет опубликован. Обязательные поля помечены *