Зазірнуць у начное зорнае неба, палюбавацца ім, адлюстраваць у фарбах сваё ўяўленне пра космас і намаляваць свае прыгоды ў ім запрасілі юных мастакоў арганізатары 13-га Міжнароднага мастацкага конкурсу «Іншым поглядам», які праходзіў у польскім горадзе Саснавец. Ганаровым папячыцелем праекта быў Польскі нацыянальны камітэт ЮНІСЕФ і мэр горада Саснавец Аркадзюш Хенчынскі.
Сёлета на конкурс былі дасланы больш за 8 тысяч работ з розных краінаў свету. Два гады гэта лічба складала толькі 1500 работ. У гэтым ліку была і работа Паліны Лайло, выхаванкі Дзятлаўскай дзіцячай школы мастацтваў. Па выніках конкурсу дзяўчынка атрымала дыплом. Як і Анастасія Дарашкевіч —мінулагодняя ўдзельніца.
Сёлета спіс дасягненняў выхаванцаў Дзятлаўскай дзіцячай школы мастацтваў дапоўніў Мікіта Жынко: хлопец адзначаны ўзнагародай Міжнароднага конкурсу «Іншым поглядам».
Для Мікіты гэта не першая спроба ўдзелу ў мастацкіх конкурсах міжнароднага фармату. У скарбонцы ўжо ёсць дыплом Міжнароднага мастацкага конкурсу у Торуні.
А сёлетняя ўзнагарода — чарговае дасягненне і стымул удасканальваць свае здольнасці.
Цікава, што на конкурс былі дасланы дзве работы Мікіты. Над адной з іх хлопец пад кіраўніцтвам сваёй настаўніцы Жанны Вячаславаўны Лукашэні працаваў працяглы час. А вось узнагародай адзначаны малюнак-экспромт, які Мікіта намаляваў усяго толькі за вечар.
Адметна і тое, што па прызнанні самога мастака больш за ўсё яму падабаецца працаваць у жанры графікі. Аднак паспяховай стала жывапісная работа.
Маляванне для Мікіты з’яўляецца захапленнем, якому ён аддае перавагу і ў вольны час. Яшчэ хлопец любіць чытаць. Кажа, што калі чалавек шмат чытае, то ў яго пашыраецца кругагляд і фантазія. Для мастака гэта проста неабходна.
У будучыні Мікіта бачыць сябе доктарам — хірургам або патолагаанатамам. А пакуль ён старанна вучыцца, малюе. Хоча паўдзельнічаць у новых конкурсах.
— У планах, — гаворыць Жанна Вячаславаўна, — асвоіць новыя мастацкія тэхнікі. Гэта дасць магчымасць навучэнцам школы паўдзельнічаць у многіх іншых конкурсах, папоўніць скарбонку дасягненняў. Спадзяюся, што спрыяць гэтаму будуць творчасць вядомых мастакоў, пашырэнне кругагляду праз чытанне кніг, перыядычнага выдання » Мастацкая галерэя», а таксама начное зорнае неба. І, увогуле, — прыгажосць , якая пануе вакол.
А. ДУБРОЎСКАЯ
Фота П. АДАМЧУКА